ரூ.40 லஞ்சம் பெற்ற பாஜக எம்.எல்.ஏ அதிரடி கைது!!

கர்நாடகாவில் 40 லட்ச ரூபாய் லஞ்சம் பெற்ற வழக்கில் பாஜக எம்.எல்.ஏவை காவல்துறையினர் கைது செய்தனர்.

தாவன்கிரே மாவட்டம் சென்னகிரி தொகுதி பா.ஜ.க எம்.எல்.ஏ. மாடால் விருபாஷப்பா, மைசூரு சாண்டல் சோப்பு மற்றும் டிடர்ஜென்ட் நிறுவனத்தின் தலைவராகவும் செயல்பட்டு வருகிறார். இவரது மகன் பிரசாந்த் பெங்களூருவில் குடிநீர்-வடிகால் வாரியத்தில் தலைமை கணக்கு அதிகாரியாக பணியாற்றினார்.

இந்நிலையில், மைசூர் சாண்டல் சோப்பு மற்றும் டிடர்ஜென்ட் நிறுவனத்திற்கு ரசாயனம் சப்ளை செய்ய டெண்டர் வழங்கும் விவகாரத்தில் ரூ.40 லட்சம் லஞ்சம் வாங்கிய போது லோக் அயுக்தா போலீசாரால் பிரசாந்த் கைது செய்யப்பட்டார்.

அதைத்தொடர்ந்து நடத்தப்பட்ட சோதனையில் அவரது வீடு மற்றும் அலுவலகத்தில் ரூ.7.72 கோடி சிக்கியது. பிரசாந்துடன், அவரது உறவினர் சித்தேஷ், சுரேந்திரா, நிகோலஸ், கங்காதர் ஆகிய 4 பேரையும் லோக் அயுக்தா போலீசார் கைது செய்தனர்.

இந்த லஞ்ச விவகாரத்தில் எம்.எல்.ஏ. மாடால் விருபாஷப்பாவுக்கும் தொடர்பு இருப்பதாக தகவல் வெளியானது. இதையடுத்து, லஞ்ச வழக்கில் முதல் குற்றவாளியாக பாஜக எம்.எல்.ஏ. மாடால் விருபாஷப்பா சேர்க்கப்பட்டார்.

கைது நடவடிக்கையில் இருந்து தப்பிக்க விருபாஷப்பா முன் ஜாமின் பெற்றார். மேலும் லோக் அயுக்தா போலீசார் நடத்திய விசாரணையில் தனது மகன் வீட்டில் சிக்கிய பணத்திற்கும், ரூ.40 லட்சம் லஞ்சத்திற்கும் தனக்கும் எந்த தொடர்பும் இல்லை என்று அவர் கூறி இருந்தார்.

இந்த விவகாரம் பூதாகாரமான நிலையில் விருபாஷப்பாவுக்கு வழங்கப்பட்ட முன் ஜாமீனை நீதிமன்றம் ரத்து செய்தது. இந்நிலையில், 40 லட்ச ரூபாய் லஞ்சம் பெற்ற வழக்கில் விருபாஷப்பாவை போலீசார் இன்று கைது செய்தனர்.

newstm.in