.png)
தாமதமாக வந்த சொமோட்டோ ஊழியர்.. ஆரத்தி எடுத்து வரவேற்ற தொழிலதிபர்..!
ஆர்டர் செய்த உணவை நான்கு மணி நேரம் தாமதமாக கொண்டு வந்த சொமோட்டோ ஊழியரை ஆரத்தி எடுத்து வரவேற்ற டெல்லி தொழிலதிபர் குறித்த வீடியோ வைரலாகி வருகிறது.
தலைநகர் டெல்லியில் தொடர் பண்டிகை காலம் என்பதால் சாலைகளில் போக்குவரத்து நெருக்கடி மிகுந்து காணப்படுகிறது. இதன் காரணமாக, ஆர்டர் செய்யும் பொருட்களை டெலிவரி முகவர்கள் தாமதமாக கொண்டு வருவதாக புகார் எழுந்துள்ளது.
இந்நிலையில், டெல்லியில் உள்ள தொழிலதிபர் சஞ்சீவ்குமார் என்பவர் சொமோட்டோவில் உணவு ஆர்டர் செய்துள்ளார். உணவு வருகைக்காக அவர் 2 மணி நேரத்திற்கும் மேலாக காத்திருந்தார். ஆனால், உணவு வரவில்லை. கடைசியில் 4 மணி நேர தாமதத்திற்குப் பின் உணவை டெலிவரி செய்யும் இளைஞர் வந்தார். அவரை, சஞ்சீவ் குமார் ஆரத்தி எடுத்து வரவேற்றார். இதனால் உணவு டெலிவரி செய்ய வந்த இளைஞர் அதிர்ச்சியடைந்தார்.
சஞ்சீவ்குமார் அத்துடன் விடவில்லை. பிரபல ஹிந்தி பாடகர் குமார் சானு பாடிய 'ஐயே ஆப்கா இன்டேசர் தா..' என்ற நகைச்சுவைப் பாடலைப் பாடியவாறு உணவு ஆர்டரை பெற்றுக்கொண்டார். இந்த காட்சியை தனது இன்ஸ்டாகிராம் பக்கத்தில் பகிர்ந்ததுடன் சொமோட்டோ நிறுவன ஐடியிலும் இந்த பதிவை சஞ்சீவ்குமார் டேக் செய்துள்ளார். இந்த வீடியோ தற்போது சமூக ஊடகங்களில் வைரலாகி வருகிறது.