2026ஆம் ஆண்டு நடைபெறவுள்ள தமிழக சட்டமன்றத் தேர்தலை முன்னிட்டு, தனியார் நிறுவனம் நடத்திய 'Vote Vibe' என்னும் கருத்துக்கணிப்பு தற்போது தமிழ்நாட்டில் ஆரம்பிக்கப்பட்டுள்ளது.இந்தக் கணக்கெடுப்பு, ஏற்கனவே கேரளாவில் நடைபெற்ற நிலையில், தமிழ்நாட்டிலும் தொடங்கப்பட்டுள்ளது.

இந்தக் கணக்கெடுப்பில், தமிழக முதல்வர் மு.க.ஸ்டாலின் தலைமையிலான திமுக அரசுக்கு எதிராக 32% பேர் கடுமையான அரசாங்க எதிர்ப்பு நிலையை வெளிப்படுத்தியுள்ளனர். ஆண்களில் 34% பேரும், பெண்களில் 29% பேரும் இதை உறுதிப்படுத்தியுள்ளனர். அரசு சாதகமாக செயல்படுகிறது என்று 17.9% பேர் மட்டுமே கூறியுள்ளனர். அதே நேரத்தில், 15% ஆண்களும், 18% பெண்களும் அரசாங்கத்திற்கு ஆதரிக்கவோ, எதிர்க்கவோ தயங்கும் நடுநிலை நிலைப்பாட்டை காட்டியுள்ளனர்.

வயது அடிப்படையில், இளைஞர்கள் திமுக ஆட்சியிடம் அதிக அதிருப்தியுடன் இருக்கின்றனர். 25-34 வயதுக்குட்பட்டவர்களில் 40% பேர் திமுக அரசின் செயல்பாடுகளிடம் அதிருப்தி தெரிவித்துள்ளனர். 18-24 வயதிற்குட்பட்ட இளைஞர்களில் 29% பேர் அரசை எதிர்த்தனர். 45-54 வயதினரிலும் 32% பேர் எதிர்ப்பு பார்வையையே தெரிவித்துள்ளனர். அதே பிரிவுகளில், ஆளும் அரசுக்கு ஆதரவு அளித்தவர்களின் விகிதம் 12% முதல் 22% வரை குறைவாகவே உள்ளது.

கருத்துக்கணிப்பில், ஆளும் அரசின் எம்.எல்.ஏ.க்கள் தங்களது தொகுதிகளில் குறைவான செயல்திறனைக் காண்பிக்கின்றனர் என்று 38.9% பேர் தெரிவித்துள்ளனர். ஆண்களில் 42% பேரும், பெண்களில் 36% பேரும் தங்களின் தொகுதியில் எம்.எல்.ஏ.க்கள் சரியாக செயல்படவில்லை எனக் கூறியுள்ளனர். 55 வயதிற்கு மேற்பட்டவர்களில் 48% பேர் அதிகமாக அதிருப்தியை வெளிப்படுத்தியுள்ளனர்.

திமுக மீதான ஆதரவை பெண்கள் அதிகம் காட்டியுள்ளனர். 41% பெண்களும், 33% ஆண்களும் திமுக ஆட்சிக்கு மீண்டும் வர வேண்டும் எனத் தெரிவிக்கின்றனர். அதிமுகவுக்காக 28% பெண்களும், 36% ஆண்களும் கருத்து தெரிவித்துள்ளனர். தமிழ்நாடு வெற்றிக் கழகத்திற்கு 13% பெண்கள், 11% ஆண்கள் ஆதரவு தெரிவித்துள்ளனர்.

வரவிருக்கும் தேர்தலில் அதிமுக-பாஜக கூட்டணிக்கான மக்களது ஆதரவையும் இந்த சர்வே பதிவு செய்துள்ளது. 38% பெண்களும், 45% ஆண்களும் இந்த கூட்டணி ஒரு நல்ல யோசனை என கருதுகின்றனர். அதே நேரத்தில், 37% பெண்கள் மற்றும் 32% ஆண்கள் இந்த கூட்டணியை எதிர்க்கும் நிலைப்பாட்டில் உள்ளனர்.

இந்த 'Vote Vibe' சர்வே, தமிழகத்தில் மக்களின் உணர்வுகளை விரிவாக வெளிக்கொணர்கிறது. இதில் மக்கள் அரசாங்கத்தின் மீதான நம்பிக்கை, எதிர்ப்பு, இளைஞர்கள் மற்றும் பெண்களின் அரசியல் பார்வைகள் உள்ளிட்டவை தெளிவாகத் தெரிகின்றன. இதனால், 2026 சட்டமன்றத் தேர்தல் முன்னேற்பாடுகளுக்கு இது ஒரு முக்கியமான சுட்டிக்காட்டாக இருக்கும் எனக் கருதப்படுகிறது.

தமிழ்நாட்டில் அடுத்த ஆண்டு மார்ச்-ஏப்ரல் மாதங்களில் தேர்தல் நடைபெற உள்ளது. 234 உறுப்பினர்களைக் கொண்ட சட்டமன்றத்தில் திமுக தலைமையிலான கூட்டணி 159 இடங்களைப் பெற்று பெரும்பான்மையைப் பெற்றது. மறுபுறம், அதிமுக தலைமையிலான கூட்டணி 75 இடங்களுக்கு மட்டுப்படுத்தப்பட்டது, இது முந்தைய தேர்தல்களில் பெற்ற எண்ணிக்கையை விட 61 குறைவாகும்.