கடலூர் மாவட்டம் செம்மங்குப்பம் அருகே, இன்று காலையில் நடைபெற்ற ரயில்–பள்ளி வாகன விபத்தில் 3 மாணவர்கள் உயிரிழந்த சம்பவம் குறித்து மாவட்ட ஆட்சியர் சி.பி. ஆதித்ய செந்தில்குமார் நேரில் சென்று ஆய்வு செய்தார்.

விபத்து நடந்த இடத்தில் செய்தியாளர்களிடம் பேசிய மாவட்ட ஆட்சியர் கூறியதாவது: “இந்த விபத்திற்கு காரணம், கேட் சரியாக மூடப்படாமையா அல்லது கேட் கீப்பரின் அலட்சியா என்பதை விசாரணையின் மூலம் உறுதி செய்யவேண்டும். இது தொடர்பாக ரயில்வே மற்றும் காவல் துறை இணைந்து முழுமையான விசாரணையை நடத்த உள்ளனர்.

விபத்து ஏற்பட்ட இந்த ரயில்வே கேட், இண்டர்லாக்கிங் இல்லாதது என்பதால், பாதுகாப்பு முறைகளில் சிக்கல் ஏற்பட்டிருக்கலாம். இந்த விபத்தில் தவறு செய்தவர்கள் மீது கட்டாயமாக நடவடிக்கை எடுக்கப்படும் என்றார். கடலூர் மாவட்ட எல்லைக்குள் உள்ள மனித பயன்பாட்டு ரயில்வே கேட்கள் கணக்கெடுக்கப்பட்டு, அதனை மேம்படுத்த பரிந்துரைக்கப்படும். மத்திய ரயில்வே துறை, தங்கள் வழிகாட்டுதல் படி ரயில்வே கேட் மாற்றுப்பணிகளை செய்வார்கள் என்றார்.

இதற்கிடையே மாவட்ட கலெக்டர் நிலம் ஒதுக்காதது தான் ரயில் விபத்துக்கு காரணம் என ரயில்வே துறை சார்பில் குற்றம்சாட்டப்பட்டுள்ளது. இதுதொடர்பாக ரயில்வே வெளியிட்ட அறிக்கையில்,"

கடலூர் செம்மங்குப்பம் பகுதியில் உள்ள ரயில்வே கேட் வழியாக பயணிகள் மற்றும் பள்ளி மாணவர்கள் தினசரி கடந்து செல்கின்றனர். இங்கு பாதுகாப்பு அதிகரிக்கும் வகையில், சுரங்க பாதை அமைக்கும் திட்டத்திற்காக நிதியும் ஒதுக்கப்பட்டுள்ளது. ஆனால் கடந்த ஒன்றாண்டுக்கும் மேலாக, மாவட்ட நிர்வாகம் அந்த திட்டத்திற்கு அனுமதி வழங்காமல் தாமதம் செய்துள்ளது,” என தெரிவித்தார்.

இந்நிலையில் விபத்து நிகழ்ந்தது குறித்து மாவட்ட ஆட்சியர் சி.பி. ஆதித்ய செந்தில்குமார் முன்பு, “விபத்து தொடர்பாக முழுமையான விசாரணை நடைபெறும். கேட் கீப்பரின் அலட்சியத்தால் விபத்து ஏற்பட்டிருக்கலாம். தவறு நிரூபிக்கப்பட்டால் கடுமையான நடவடிக்கை எடுக்கப்படும்,” என தெரிவித்திருந்தார்.

தெற்கு ரயில்வே மற்றும் மாவட்ட நிர்வாகம் இருவரும் ஒருவர்மீது ஒருவர் குற்றஞ்சாட்டி வருகின்றனர். இது போன்ற கேட் இடங்களில் சுரங்க பாதைகள் அல்லது மேம்பாலம் அமைக்காததால் மாணவர்கள் உயிரிழக்க நேரிடுகிறது என்று சமூக ஆர்வலர்கள் வலியுறுத்துகின்றனர்.