இன்று இரவு அமெரிக்கா செல்கிறார் முதல்வர் ஸ்டாலின்..! எங்கெல்லாம் செல்கிறார்?

முதலமைச்சராக பொறுப்பேற்றது முதல் ஸ்டாலின் தொழில் துறையில் தமிழகத்தை முன்னிலையில் கொண்டுவர பல்வேறு திட்டங்களை தீட்டி வருகிறார். பன்னாட்டு நிறுவனங்களை தமிழகத்தில் தொழில் தொடங்க அழைத்து வருகிறார். அந்த வகையில் இன்று அமெரிக்கா கிளம்பும் அவர் அங்கு பல்வேறு முதலீட்டாளர்களை சந்திக்க உள்ளார்.

2030ஆம் ஆண்டுக்குள் ஒரு டிரில்லியன் அமெரிக்க டாலர் பொருளாதார மாநிலமாக தமிழ்நாட்டை மாற்ற முதல்வர் ஸ்டாலின் இலக்கு நிர்ணயித்துள்ளார்.

இதன் காரணமாக உள் நாட்டிலும் வெளிநாடுகளிலும் முதலீட்டாளர்கள் மாநாடு தொடர்ச்சியாக நடைபெற்று வருகிறது. கடந்த ஜனவரி மாதம் உலக முதலீட்டாளர்கள் மாநாட்டை சென்னையில் தமிழக அரசு நடத்தி, அதன் மூலம் ரூ.6 லட்சம் கோடிக்கும் அதிகமான முதலீடுகளுக்கு புரிந்துணர்வு ஒப்பந்தங்கள் மேற்கொள்ளப்பட்டன.

துபாய், அபுதாபி, சிங்கப்பூர், ஜப்பான்,ஸ்பெயின் உள்ளிட்ட பல்வேறு நாடுகளுக்கும் சென்று முதலீட்டாளர்களை சந்தித்து தமிழ்நாட்டில் முதலீடு செய்ய வரும்படி முதல்வர் மு.க.ஸ்டாலின் அழைப்பு விடுத்தார்.

இவற்றின் பயனாக கடந்த 3 ஆணடுகளில் 31 லட்சம் பேருக்கு வேலைவாய்ப்பு அளிக்கும் விதமாக ரூ.9.94 லட்சம் கோடிக்கும் அதிகமான முதலீடுகள் ஈர்க்கப்பட்டுள்ளன.

இவற்றின் தொடர்ச்சியாக, முதல்வர் ஸ்டாலின் முதலீட்டாளர்களை சந்திக்க இன்று  (ஆகஸ்ட் 27) இரவு 10 மணிக்கு எமிரேட்ஸ் விமானம் மூலம் சென்னையில் இருந்து அமெரிக்கா புறப்பட்டுச் செல்கிறார். விமான நிலையத்தில் அமைச்சர்கள், திமுக முக்கிய நிர்வாகிகள் முதல்வரை வழியனுப்ப உள்ளனர். அமெரிக்காவில் 17 நாட்கள் முதல்வர் தங்கி, பல்வேறு நிகழ்ச்சிகளில் பங்கேற்று செப்டம்பர் 12ஆம் தேதி சென்னை திரும்புகிறார்.

இன்று கிளம்பும் ஸ்டாலின் ஆகஸ்ட் 28ஆம் தேதி சான் பிரான்சிஸ்கோவில் முதலீட்டாளர்கள் மாநாட்டில் பங்கேற்கிறார். இந்த மாநாட்டில் தொழில் தொடங்க தமிழகம் வரும்படி முதலீட்டாளர்களுக்கு முதல்வர் ஸ்டாலின் அழைப்பு விடுப்பதுடன், முக்கிய முதலீடுகளுக்கான ஒப்பந்தங்களும் கையெழுத்தாக உள்ளதாக கூறப்படுகிறது.

ஆகஸ்ட் 31ஆம் தேதி புலம்பெயர்ந்த தமிழக மக்களை சந்தித்து கலந்துரையாடுகிறார்.

செப்டம்பர் 2ஆம் தேதி சான்பிரான்சிஸ்கோவில் இருந்து சிகாகோ செல்கிறார். அங்கு செப்டம்பர் 12ஆம் தேதி வரை தங்கியிருக்கும் அவர் முன்னணி நிறுவன முதலீட்டாளர்களை சந்திக்கிறார்.

குறிப்பாக அங்கு, பார்ச்சூன் 500 பட்டியலில் உள்ள சர்வதேச முன்னணி நிறுவனங்களின் தலைவர்களுடன் பேசுகிறார். மேலும், கூகுள் சிஇஓ சுந்தர் பிச்சை உள்ளிட்ட முக்கிய நிறுவனங்களின் உயர் பொறுப்பில் இருப்பவர்களையும் சந்திக்க உள்ளார். இவற்றுக்கிடையில் செப்டம்பர் 7ஆம் தேதி அயலக தமிழர்களுடனான சந்திப்பு நிகழ்ச்சியில் பங்கேற்கிறார்.

இதற்கான ஏற்பாடுகளை முன்கூட்டியே அமெரிக்கா சென்றுள்ள தொழில்துறை அமைச்சர் டிஆர்பி.ராஜா மற்றும் அதிகாரிகள் மேற்கொண்டுள்ளனர்.

பயணத்தை முடித்துக் கொண்டு வரும் செப்டம்பர் 12ஆம் தேதி முதல்வர் ஸ்டாலின் சென்னை திரும்புவார் என கூறப்படுகிறது.