தமிழக பாஜக மாநிலத் தலைவர் ரேஸில் புதிய நபர்... யார் இந்த ஆனந்தன் அய்யாசாமி?

தமிழக பாஜகவிற்கு அடுத்த மாநிலத் தலைவர் யார்? என்ற கேள்வி எழுகிறது. இதற்கான ரேஸில் நயினார் நாகேந்திரன் பெயர் அதிகம் அடிபட்டது.

ஆனால் பாஜக மாநிலத் தலைவர் தேர்தலுக்கான அறிவிப்பில் 10 ஆண்டுகள் அடிப்படை உறுப்பினர் என்ற அம்சத்தால் வாய்ப்பு பறிபோனது. இந்த விதியில் திருத்தங்கள் செய்யப்படக்கூடும் என்கின்றனர். அதேசமயம் வேறு யார், யார் மாநிலத் தலைவர் பதவிக்கான ரேஸில் இருக்கின்றனர் என்ற கேள்வி எழுகிறது. பொன்.ராதாகிருஷ்ணன், வானதி சீனிவாசன், தமிழிசை சவுந்திரராஜன் உள்ளிட்டோரின் பெயர்களும் முன்வைக்கப்படுகின்றன.

இவர்களுக்கு மத்தியில் ஆனந்தன் அய்யாசாமி பெயரும் பேசுபொருளாக மாறியிருக்கிறது. ஆனால் இவரை பற்றி பலருக்கும் தெரிந்திருக்க வாய்ப்பில்லை. இவர் தென்காசி மாவட்ட பாஜக தலைவராக இருக்கிறார். தமிழக பாஜகவின் ஸ்டார்ட்-அப் செல் பிரிவின் தலைவர்.

மிக முக்கியமாக ZOHO நிறுவனத்தின் ஸ்ரீதர் வேம்புவிற்கு நெருக்கமானவர். அண்ணாமலை முன்னெடுத்த ”என் மண் என் மக்கள்” யாத்திரையில் தனது மாவட்டத்தின் பொறுப்பாளராக இருந்தார். தொண்டு நிறுவனங்கள் மூலம் நலத்திட்ட உதவிகளை செய்து வருகிறார். ஆனந்தன் அய்யாசாமிக்கும் ஐடி துறையில் சம்பந்தமுண்டு. அமெரிக்காவில் உள்ள Intel நிறுவனத்தில் பணியாற்றியுள்ளார். பின்னர் பாஜக மீதான ஈடுபாட்டால் தமிழகம் திரும்பி தீவிர அரசியலில் களமிறங்கினார்.

தேசிய தலைவர்கள் உடனும் நெருக்கம் காட்டி வந்துள்ளார். 2024 மக்களவை தேர்தலின் போது தென் மாவட்டங்களில் பாஜகவிற்காக பிரச்சார களத்தில் தீவிரம் காட்டினார். எனவே பாஜக மாநிலத் தலைவராக ஆனந்தன் அய்யாசாமி தேர்வு செய்யப்பட்டால் தென் மாவட்டங்களில் கட்சியின் வளர்ச்சிக்கு அடித்தளம் போடுவார் என எதிர்பார்க்கப்படுகிறது.