திடீர் மாரடைப்பு..! பயணிகளை காப்பாற்றிய ஓட்டுநர் பரிதாப மரணம்!

பூந்தமல்லியில் இருந்து சுங்குவார்சத்திரம் வரை செல்லும் பேருந்தின் ஓட்டுநரான கடம்பத்தூர் பகுதியைச் சேர்ந்தவர் ஸ்ரீதர்.

இவர் நேற்று ஸ்ரீபெரும்புதூரில் இருந்து பூந்தமல்லி நோக்கி 20க்கும் மேற்பட்ட பயணிகளுடன் வந்து கொண்டிருந்தார். அப்போது திடீரென அவருக்கு நெஞ்சு வலி ஏற்பட்டுள்ளது.

இந்நிலையில், பேருந்து ஓட்டுநர் ஸ்ரீதர் சாதூர்யமாக செயல்பட்டு பேருந்தை பத்திரமாக ஓரங்கட்டி நிறுத்தினார். இதனால் பெரும் விபத்து தவிர்க்கப்பட்டது. இதையடுத்து பயணிகள் உதவியுடன் ஓட்டுநரை மீட்ட நடத்துநர் திருப்பதி, 108 ஆம்புலன்ஸ் மூலம் ஸ்ரீபெரும்புதூர் அரசு மருத்துவமனைக்கு கொண்டு சென்றார்.

அங்கு முதலுதவி பெற்று மேல் சிகிச்சைக்காக செங்கல்பட்டு அரசு மருத்துவமனைக்கு கொண்டு சென்ற நிலையில், சிகிச்சை பலனின்றி ஸ்ரீதர் உயிரிழந்தார்.