வெற்றி நிச்சயம் திட்டம் என்றால் என்ன?

தமிழகத்தில் படித்தும் வேலையில்லாத இளைஞர்கள், படிப்பை பாதியிலேயே நிறுத்தியவர்கள் என அனைவருக்கும் வேலைவாய்ப்பை ஏற்படுத்தி கொடுக்க வேண்டும் என்ற உயரிய நோக்கத்தோடு முதலமைச்சர் மு.க.ஸ்டாலின் 01 ஜூலை 2025 அன்று அறிமுகப்படுத்திய முன்னோடி திட்டமே வெற்றி நிச்சயம் திட்டம் (Vetri Nichayam Thittam). இந்த திட்டத்தின் மூலமாக இளைஞர்களுக்கு தொழில்துறை சான்றிதழுடன் பல்வேறு துறைகளிலும் இலவச குறுகிய கால திறன் பயிற்சிகள் வழங்கப்படும். முதற்கட்டமாக இந்த திட்டத்திற்கு ரூ.100 கோடி ஒதுக்கப்பட்டுள்ளது.

 

வெற்றி நிச்சயம் திட்டத்தின் நோக்கங்கள்

வெற்றி நிச்சயம் என்பது இந்த திட்டத்தின் பெயர் மட்டுமல்ல. இத்திட்டத்தின் கீழ் பயிற்சி பெறும் 75,000 இளைஞர்களுக்கு வேலை கிடைக்கும் வரை பயிற்சி அளித்து வேலை பெற்று கொடுக்க வேண்டும் என்பதே அரசின் ஒரே இலக்கு. மேலும், பல்வேறு காரணங்களால் படிப்பை பாதியில் நிறுத்திய அனைத்து மாணவ, மாணவியருக்கும் கல்வி மற்றும் வேலைவாய்ப்பை வழங்க வேண்டும் என்பதே திட்டத்தின் முக்கியமான நோக்கமாகவே உள்ளது.

 

வெற்றி நிச்சயம் திட்டத்தின் சிறப்பம்சங்கள்

மாவட்டந்தோறும் உள்ள முதன்மையான தொழிற்பிரிவுகளை கண்டறிந்து அது தொடர்புடைய பயிற்சி நிறுவனங்கள், தொழில் துறை நிறுவனங்கள் மற்றும் அரசு சார்ந்த திறன் பயிற்சி முன்னெடுப்புகள் மூலமாக அந்தந்த மாவட்டங்களைச் சார்ந்த இளைஞர்களுக்கு திறன் பயிற்சி வழங்கப்படும்.

தொலைத் தொடர்பு, விவசாயம், விண்வெளி, ஆடைகள், BFSI, தானியங்கி, மூலதனப் பொருட்கள், கட்டுமானம், மின்னணுவியல், சுகாதாரம், ஐடி, சில்லறை விற்பனை, பசுமை வேலைகள், உணவுத் தொழில் போன்ற பல்வேறு துறைகளில் நிபுணத்துவம் வாய்ந்த பயிற்சியாளர்களை கொண்டு தரமான பயிற்சிகள் வழங்கப்படுவதோடு, ஜெர்மன் உள்ளிட்ட அயல்மொழிப் பயிற்சிகள் அளிக்கப்பட்டு தமிழ்நாட்டு இளைஞர்களுக்கு வெளிநாட்டில் வேலைவாய்ப்பு கிடைப்பதற்கான பாதைகள் உருவாக்கித் தரப்படும்.

வளர்ந்து வரும் தொழில்துறைக்கு ஏற்ப இளைஞர்கள் தாங்கள் விரும்பும் மிகப்பெரிய நிறுவனங்களின் வேலைவாய்ப்பை சுலமாக பெறுவதற்கும், அதற்கு தகுந்த நவீன தொழில் நுட்பம் சார்ந்த திறன் பயிற்சிகள் வழங்கப்படும்.

 

வெற்றி நிச்சயம் திட்டத்தின் முக்கியமான நன்மைகள்

இந்த திட்டத்தின் வாயிலாக உலகத் தரம் வாய்ந்த 500க்கும் மேற்பட்ட முன்னணி பயிற்சி நிறுவனங்கள் மற்றும் தொழில்துறை நிறுவனங்கள் இணைந்து 38 தொழிற்பிரிவுகளில் 165 திறன் பயிற்சிகள் இலவசமாக வழங்கப்பட உள்ளன. மேலும், இந்த பயிற்சிக்கான மொத்த கட்டணத்தையும் அரசே செலுத்தும். இதனால், மாணவர்கள் எந்தவொரு நிதிச் சிக்கலையும் எதிர்கொள்ளாமல் தங்கள் படிப்பை முடிக்க முடியும்.

மற்றொரு நன்மையாக, பயிற்சியின் போது இதர செலவுகளை ஈடுகட்ட பயனாளிகளுக்கும் ரூ.12,000 ஊக்கத்தொகையும் அரசு சார்பாக வழங்கப்படும். அதுமட்டுமல்லாமல், தொலைதூர மாவட்டங்களிலிருந்து, பயிற்சி பெற விரும்பும்‌ மாணவர்களுக்கு, உணவுடன்‌ கூடிய இருப்பிட வசதியும்‌, தமிழ்நாடு திறன்‌ மேம்பாட்டுக்‌ கழகம்‌ மூலமாக வழங்கப்படும்‌.

பயிற்சியின் இறுதியில் ஒவ்வொருவருக்கும் அங்கீகரிக்கப்பட்ட திறன் சான்றிதழ் வழங்கப்படும். இந்த சான்றிதழ் இளைஞர்கள் தங்கள் கனவு நிறுவனங்களில் வேலை பெற மிகவும் உறுதுணையாக இருக்கும். மாற்றுத்திறனாளிகள்‌, பழங்குடியினர்‌, இலங்கைத்‌ தமிழர்கள்‌, மீனவ இளைஞர்கள்‌, சிறுபான்மையினர்‌, நகர்ப்புற வாழ்விட மேம்பாட்டு இளைஞர்கள்‌ மற்றும்‌ தூய்மைப்‌ பணியாளர்கள்‌ என்று சமூக மற்றும்‌ பொருளாதார ரீதியாக பின்தங்கிய வகுப்பினர்கள்‌ அனைவருக்கும்‌ இந்தத்‌ திட்டத்தில்‌ முன்னுரிமை அளிக்கப்படும்.

வெற்றி நிச்சயம் திட்டத்தின் தகுதி வரம்புகள்

இந்த திட்டத்தின் கீழ் பயன்பெற விரும்பும் விண்ணப்பதாரர் தமிழ்நாட்டில் வசிப்பவராகவும், 18 முதல் 35 வயதுக்குட்பட்டவராகவும் இருக்க வேண்டும். அதேபோல், விண்ணப்பதாரர் வேலை இல்லாதவராகவும், வேலை தேடுபவராகவும் இருக்க வேண்டும் அல்லது பள்ளி/கல்லூரி படிப்பை பாதியில் நிறுத்தியவராக இருக்க வேண்டும்.

வெற்றி நிச்சயம் திட்டத்திற்கு தேவையான ஆவணங்கள்

• ஆதார் கார்டு
• சாதிச் சான்றிதழ்
• வங்கி கணக்கு விவரங்கள் (உதவித்தொகை வழங்குவதற்காக)
• சமீபத்திய பாஸ்போர்ட் சைஸ் போட்டோ
• வாக்காளர் அடையாள அட்டை
• வருமானச் சான்றிதழ்
• கல்வி தகுதிச் சான்றிதழ்கள்
• இருப்பிடச் சான்றிதழ்
• மின்னஞ்சல் ஐடி மற்றும் மொபைல் எண்

வெற்றி நிச்சயம் திட்டத்தின் பயிற்சி நிறுவனங்கள் பட்டியல்

• டெக் மஹிந்திரா ஃபவுண்டேஷன்
• டாடா எலெக்ட்ரானிக்ஸ்
• எல்ஜி (LG)
• அசோக் லைலேண்ட்
• அப்பல்லோ
• ZF ரானே TVS சப்ளை செயின்
• எம்.ஆர்.எஃப் (MRF)
• செயிண்ட் கோபேன்
• டி.ஐ. முருகப்பா குரூப்
• பிரேக்ஸ் இந்தியா
• அமேசான் வெப் சர்வீஸ்
• டேலி (Tally)

வெற்றி நிச்சயம் திட்டத்தில் எத்தனை படிப்புகள் உள்ளன?

இந்த திட்டத்தின் வாயிலாக 38 தொழிற்பிரிவுகளில் 165 வேலை சார்ந்த படிப்புகள் உள்ளன. அந்த படிப்புகள் ஒவ்வொன்றும் கல்வி நிலையைப் பொறுத்து பலவகைகளாகப் பிரிக்கப்பட்டுள்ளன. திட்டத்தில் இடம்பெற்றுள்ள படிப்புகளை தெரிந்துக் கொள்ள, TN Skill Wallet வலைத்தளத்தின் முகப்பு பக்கத்தில் உள்ள Explore Course என்ற ஆப்ஷனை கிளிக் செய்ய வேண்டும். இப்போது, All, Non graduates, Graduates என்ற ஆப்ஷன் இருக்கும். அவற்றில் உங்களுக்கு தகுந்த பாடநெறி வகையைத் தேர்ந்தெடுத்து படிப்புகள் மற்றும் பயிற்சிகள் குறித்து தெளிவாக தெரிந்துக் கொள்ளலாம்.

 

வெற்றி நிச்சயம் திட்டத்திற்கு விண்ணப்பிக்கும் முறை

வெற்றி நிச்சயம் திட்டத்தின் கீழ் திறன் பயிற்சி பெற அதிகாரப்பூர்வ செயலி (Skill Wallet App) மூலமாகவோ அல்லது தமிழ்நாடு திறன் மேம்பாட்டுக் கழக வலைத்தளம் (https://candidate.tnskill.tn.gov.in/skillwallet/) மூலமாகவோ விண்ணப்பிக்கலாம்.

முதலில், ஸ்கில் வாலட் செயலியை டவுன்லோடு செய்துக் கொள்ளவும் அல்லது தமிழ்நாடு திறன் மேம்பாட்டுக் கழக வலைத்தளத்தைப் பார்வையிடவும். முகப்பு பக்கத்தில் Register என்ற ஆப்ஷனை கிளிக் செய்து உங்களுடைய தொலைபேசி எண்ணை உள்ளீட்டு, OTP ஐ பெற்று பதிவு செய்துக் கொள்ளவும். இப்போது, விண்ணப்பப் படிவத்தில் தனிப்பட்ட மற்றும் கல்வி விவரங்களை பிழையில்லாமல் நிரப்பிக் கொள்ளவும்.

பின்னர், தேவையான ஆவணங்கள் அனைத்தும் பதிவேற்றம் செய்து, உங்களுக்கு பிடித்த துறை மற்றும் ஆர்வமுள்ள படிப்பைத் தேர்ந்தெடுத்துக் கொள்ளவும். கடைசியாக விண்ணப்பப் படிவத்தில் உள்ள அனைத்து விவரங்களையும் ஆவணங்களையும் மீண்டும் ஒருமுறை சரிபார்த்து Submit பொத்தானை கிளிக் செய்து விண்ணப்பத்தை சமர்ப்பிக்கவும்.