நீரில் மூழ்கும் நெற்பயிர்கள் : தமிழக அரசுக்கு வலுக்கும் கோரிக்கை..!

தொடர் மழை காரணமாக டெல்டாவில் பயிரிடப்பட்டு இருந்த ஆயிரக்கணக்கான ஏக்கர் சம்பா நெற்பயிர்கள் தண்ணீரில் மூழ்கியுள்ளன.

அதே சமயம் வரும் நாட்களிலும் டெல்டா மாவட்டங்களில் மழை இருக்கும் என வானிலை ஆய்வு மையம் எச்சரித்துள்ளது. அவ்வாறு மழை பெய்தால் நெற்பயிர்கள் அழுகும் அபாயம் உள்ளதாக விவசாயிகள் கவலை தெரிவிக்கின்றனர். அதே சமயம் வாய்க்கால்கள், ஆறுகள் தூர்வாரப்படாததால் மழைநீர் வடியவில்லை என்று எதிர்க்கட்சிகள் குற்றம்சாட்டி வருகின்றன.

இதுதொடர்பாக தமிழ் மாநில காங்கிரஸ் தலைவர் ஜி.கே.வாசன் வெளியிட்ட அறிக்கையில், தமிழகத்தில் பல்வேறு மாவட்டங்களில் மழை பெய்து வருகிறது என்றும், குறிப்பாக டெல்டா மாவட்டங்களில் தொடர்ந்து மழை பெய்து வருவதாகவும், அதனால் நெற்பயிர்கள் நீரில் முழ்கி விவசாயிகளை மிகுந்த கவலைக்குள்ளாக்கி இருக்கிறது என்றும் குறிப்பிட்டார்.
 

தஞ்சையில் உள்ள தேசிய நெடுஞ்சாலையில் உள்ள வாய்க்கால்கள் முறையாக தூர்வார்வாரப்படவில்லை என்ற வாசன், “அதனால் மழைநீர் வடியாமல் பயிர்கள் நீரில் முழ்கியுள்ளது என்று டெல்டா மாவட்ட விவசாயிகள் குற்றச்சாட்டை எழப்பியுள்ளனர். ஆயிரக்கனக்கான ஏக்கர் சம்மா மற்றும் தாளடி நெற்பயிர்கள் மழைநீரில் மூழ்கி பெரும் நஷ்டத்தை ஏற்படுத்தியுள்ளது” என்றும் சுட்டிக்காட்டினார்.

ஆகவே மழைநீரில் மூழ்கியுள்ள பயிர்களை காக்க உரிய நடவடிக்கையை தமிழக அரசும், மாவட்ட ஆட்சியரும் எடுக்க வேண்டும் என்றும் தொடர் மழையால் பாதிக்கப்பட்ட விவசாய நிலங்களை ஆய்வு செய்து அவற்றிக்கு உரிய நிவாரணம் வழங்கி விவசாயிகளின் வாழ்வாதாரத்தை காக்க வேண்டும் எனவும் ஜி.கே.வாசன் வலியுறுத்தியுள்ளார்.

இதேபோல டிடிவி தினகரன் வெளியிட்ட அறிக்கையில், டெல்டா மாவட்டங்களில் தொடரும் கனமழையால் நீரில் மூழ்கி அழுகும் நிலையில் நெற்பயிர்கள் உள்ளதாகவும், கால்வாய்களை முறையாக தூர்வாராமல் விவசாயிகளை துயரத்துக்குள்ளாக்கும் திமுக அரசின் அலட்சியப்போக்கு கடும் கண்டனத்திற்குரியது என்றும் குறிப்பிட்டார். விளைநிலங்களில் தேங்கியிருக்கும் மழைநீரை போர்க்கால அடிப்படையில் வெளியேற்ற உரிய நடவடிக்கை எடுக்க வேண்டும் எனவும் அவர் வலியுறுத்தி உள்ளார்.