சதுரகிரி மலை கோவிலில் சுமார் ஒரு கிலோ மீட்டர் தூரத்திற்க்கு மேல் கூட்ட நெரிசல்..!

விருதுநகர் மாவட்டம் ஸ்ரீவில்லிபுத்தூர் அருகே வத்திராயிருப்பு மேற்கு தொடர்ச்சி மலை பகுதியில் அமைந்துள்ள சதுரகிரி சுந்தரமகாலிங்கம் கோவிலுக்கு இன்று ஆடி அமாவாசை திருவிழாவை முன்னிட்டு பல்லாயிரக்கணக்கான பக்தர்கள் வந்தனர். பல்வேறு மாவட்டங்களில் இருந்து வருகை புரிந்த பக்தர்கள் மலைப்பாதை வழியாக மலை ஏறி சென்று சாமி தரிசனம் செய்தனர். தாணிப்பாறை அடிவாரப் பகுதியில் இருந்து 7 கி.மீ தொலைவில் சதுரகிரி சுந்தர மகாலிங்கம் கோவிலுக்கு, பக்தர்கள் நடந்து சென்று சுவாமி தரிசனம் செய்தனர்.

இந்த நிலையில் பக்தர்களின் வருகை அதிகமாக இருந்ததால் கோவிலுக்கு செல்லும் வழியில் உள்ள மாங்கனி ஓடையிலிருந்து சங்கிலி பாறை வரை பக்தர்களின் கூட்டம் அதிகமாக இருந்தது.

சுமார் ஒரு கிலோ மீட்டர் தூரத்திற்கு மேல் கூட்ட நெரிசல் ஏற்பட்டு பக்தர்கள் ஏற முடியாமலும் இறங்க முடியாமலும் தவித்தனர். மேலும் அப்பகுதியில் பாதுகாப்பு பணியில் ஈடுபட்டுள்ள போலீசார், வனத்துறையினர், தீயணைப்பு துறையினர் கூட்ட நெரிசலை கட்டுப்படுத்த முடியாமல் திணறி வருகின்றனர்.