நெற்பயிர்கள் சேதம் - முதல்வர் மு.க.ஸ்டாலினுக்கு சபாநாயகர் அப்பாவு கடிதம்..!

நெல்லை, தென்காசி மாவட்டங்களில் கனமழை பெய்ததால் குற்றாலம் அருவியில் வெள்ளப் பெருக்கு ஏற்பட்டது. திடீர் கனமழை காரணமாக அறுவடைக்கு தயாராக இருந்த நெற்பயிர்களும் சேதமடைந்தன.

நெல்லை விவசாயிகள் ஏக்கருக்கு 25,000 ரூபாய் வரை செலவு செய்து கிட்டத்தட்ட அறுவடை செய்ய இருந்த சூழலில் மழை வந்ததால், முற்றிலுமாக முளைத்துவிட்டது என்றும் கூறப்படுகிறது. இந்த நிலையில் மழையால் சேதமடைந்த நெற்பயிர்கள் தொடர்பாக சபாநாயகரும், நெல்லை மாவட்டம் ராதாபுரம் எம்எல்ஏவுமான அப்பாவு, முதல்வர் மு.க.ஸ்டாலினுக்கு கடிதம் எழுதியுள்ளார்.

அதில், “நெல்லை மாவட்டத்தில் பல பகுதிகளில் நெற்பயிர்கள் விளைந்து அறுவடையும் முடிந்துவிட்டது. சில பகுதிகளில் நீண்டகால பயிர்கள் விளைந்து, அறுவடைக்கு தயாராக இருந்த நேரத்தில், தொடர் மழையின் காரணமாக நெல் தண்ணீரில் மூழ்கி, முழுவதுமாக முளைத்துவிட்டது. இதனால், நெற்பயிர்களும், வைக்கோலும்கூட பயன்படுத்த முடியாத நிலை ஏற்பட்டுள்ளது” என்று சுட்டிக்காட்டியுள்ளார்.

குறிப்பாக இராதாபுரம் சட்டமன்றத் தொகுதியில் கடந்த ஒரு வாரமாக பலத்த மழை பெய்து வருவதாகத் தெரிவித்த அப்பாவு, “இதனால் வேளாண் பயிர்கள் மழை நீரில் மூழ்கி முற்றிலுமாக சேதமடைந்துள்ளன. பணகுடிக்கு அருகிலுள்ள பெரிய புதுகுளம், புஞ்சை குட்டிகுளம் பாசனப் பகுதிகளில், விவசாயிகள் நெல் பயிர் சாகுபடி செய்த, நெல்மணிகள் விளைந்து, அறுவடைக்கு தயார் நிலையில் இருந்து வந்தது. கடந்த 10 நாட்களாக பெய்த கனமழையால், நெல்மணிகள் முளைத்து, முற்றிலும் சேதமடைந்துள்ளன” என்று சுட்டிக்காட்டினார்.அதேபோல், இராதாபுரம் தாலுகா, கும்பிகுளம், பெருங்குடி, திசையன்விளை தாலுகா, கோட்டை கருங்குளம் பகுதிகளில் பெய்த கனமழை காரணமாக நெல்பயிர்கள் கடுமையாக சேதமடைந்துள்ளது என்றும், இதேபோல், திருநெல்வேலி மாவட்டம் முழுவதும் பல இடங்களில் நெல்மணிகள் தண்ணீரில் மூழ்கி, சேதமடைந்துள்ளது எனவும் விவரித்துள்ளார்.

மேலும், “நெல்லை மாவட்ட நிர்வாகம், மாவட்ட முழுவதும் ஏற்பட்டுள்ள நெற்பயிர் சேதத்தை ஆய்வு செய்து, இதனை பேரிடராக கருதி, அரசு உரிய அறிக்கை பெற்று, பாதிக்கப்பட்டுள்ள விவசாயிகள் அனைவருக்கும் உடனடியாக முழுமையான நிவாரணம் கிடைத்திட நடவடிக்கை எடுக்க வேண்டும்” என முதல்வர் மு.க.ஸ்டாலினுக்கு வலியுறுத்தி உள்ளார்.