ஒருமையில் பேசிய சீமான் - நாதக நிர்வாகிகள் பரபரப்பு குற்றச்சாட்டு!

அண்மைக் காலமாக நாம் தமிழர் கட்சியில் இருந்து கருத்து வேறுபாடு காரணமாக முக்கிய நிர்வாகிகள் பலரும் விலகி வருகிறார்கள். கட்சிக்காக அனைத்தையும் இழந்துவிட்டதாகவும், சீமான் சர்வாதிகாரத்தனமாக கட்சியை நடத்துவதாகவும் அவர்கள் குற்றம்சாட்டினர். ஆனால், கட்சியில் இருந்து விலகினால் கவலையில்லை என்று சீமான் தெரிவித்துவிட்டார்.

இந்த நிலையில் நெல்லை மாவட்ட நாம் தமிழர் கட்சி நிர்வாகிகள் கூட்டம் சீமான் தலைமையில் பாளையங்கோட்டையில் நடைபெற்றது. அப்போது, கருத்து தெரிவிக்க முயன்ற சில நிர்வாகிகளுக்கு அனுமதி மறுக்கப்பட்டதாகக் கூறப்படுகிறது. இதுதொடர்பாக தள்ளுமுள்ளு ஏற்பட்ட நிலையில், 50க்கும் மேற்பட்ட நிர்வாகிகள் வெளியேற்றப்பட்டனர்.

இது எனது கட்சி, எனது முடிவு, யாரும் கருத்து சொல்ல தேவையில்லை என சீமான் கூறியதாக வெளியேற்றப்பட்ட நிர்வாகிகள் கருத்து தெரிவித்தனர்.இதுதொடர்பாக பேட்டியளித்த நெல்லை மாவட்ட நாதக இளைஞரணி செயலாளர் பர்வீன், “நான் 8 வருடங்களாக நாம் தமிழர் கட்சியில் இருக்கிறேன். 7 வருடங்களாக பொறுப்பில் இருந்து வருகிறேன். கட்சிக்காக எவ்வளவு உழைத்துள்ளோம் என்பது அனைவருக்கும் தெரியும்.

அண்ணன் சீமான் பேசி முடித்ததும் கேள்வி எழுப்ப எழுந்தபோது, நீ யார் கட்சிக்கும், உனக்கும் என்ன சம்பந்தம் என்று கேட்கிறார். அவரிடம் யார் வேண்டுமானாலும் என்ன வேண்டுமானாலும் கூறலாம். அதுதொடர்பாக என்னை அழைத்து விசாரித்திருக்கலாம் அல்லவா? ஆனால், இருப்பது என்றால் இரு.. இல்லையெனில் வெளியே போடா.. இது என் கட்சி என்று கூறுகிறார். மேலும், கருத்து கூற முயன்ற நிர்வாகிகளை சாட்டை துரைமுருகன் அடிக்க முயன்றுள்ளார். இதனால் மற்ற நிர்வாகிகளும் வெளியே வந்துள்ளனர்” என்று தெரிவித்தார்.