இன்று ரேஷன் கடைகள் வழக்கம் போல் செயல்படும்..!

தமிழ்நாடு முழுவதும் செயல்படும் 24,610 முழு நேர நியாய விலைக் கடைகள், 10,164 பகுதி நேர நியாய விலைக் கடைகள் என மொத்தம் 34,774 நியாய விலைக் கடைகளில் குடிமைப் பொருட்களைப் பெற்று தீபாவளிப் பண்டிகையினை பொதுமக்கள் சிறப்பாக கொண்டாட ஏற்பாடு செய்யப்பட்டுள்ளது.

அந்த வகையில் அனைத்து முழு நேர மற்றும் பகுதி நேர நியாயவிலைக் கடைகளும் இன்று ஞாயிற்றுக் கிழமை (27.10.2024) அன்று முழுவதுமாக வழக்கம்போல் செயல்படும் என தமிழக கூட்டுறவுத் துறை அமைச்சர் கேஆர்.பெரியகருப்பன் அறிவித்திருந்தார். இந்நிலையில் தற்போது மீண்டும் ஒரு அறிவிப்பு வெளியாகியுள்ளது. ரேஷன் கடைகள் செயல்படும் நாள் குறித்த இந்த அறிவிப்பு ரேஷன் அட்டைதாரர்களுக்கு மிக முக்கியமான அறிவிப்பாகும். ஞாயிறு விடுமுறையன்று ரேஷன் கடைகள் செயல்படும் என்று அறிவிக்கப்பட்டுள்ளதால் அதை ஈடுகட்ட இன்னொரு நாள் ரேஷன் கடைகளுக்கு விடுமுறை அறிவிக்கப்பட்டுள்ளது.

தீபாவளிப் பண்டிகை வருகிற அக்டோபர் 31ஆம் தேதி அன்று கொண்டாடப்படுவதாலும், அன்றைய தினம் மாத இறுதி நாளாக இருப்பதாலும் அரிசி மற்றும் இதர அத்தியாவசியப் பொருட்கள் குடும்ப அட்டைதாரர்களுக்குத் தங்கு தடையின்றி கிடைப்பதற்கு ஏதுவாக தமிழ்நாட்டிலுள்ள அனைத்து நியாயவிலைக் கடைகளும் இன்று ஞாயிற்றுக்கிழமை (27. 10. 2024) அன்று செயல்படும் என்று தமிழக அரசு அறிவித்துள்ளது. எனவே, குடும்ப அட்டைதாரர்கள் தங்களுக்குரிய பொது விநியோகத் திட்ட பொருட்களை 27. 10. 2024 (ஞாயிற்றுக் கிழமை) அன்றும் அனைத்து நியாயவிலைக் கடைகளிலும் பெற்றுக்கொள்ளலாம் என்று அரசு தரப்பில் கூறப்பட்டுள்ளது.

இந்த விடுமுறை நாளில் பணியாற்றுவதற்கு ஈடாக 16. 11. 2024 சனிக்கிழமை அன்று பொது விநியோகத் திட்ட கடைகளுக்கு விடுமுறை நாளாக இருக்கும் என்று தமிழக அரசு அறிவித்துள்ளது. தீபாவளி பண்டிகையை பொதுமக்கள் சிறப்பாகக் கொண்டாடும் வகையில்தான் தமிழக அரசு இந்த ஏற்பாட்டைச் செய்துள்ளது.