தமிழக வெற்றிக் கழகத்தின் 2- ஆவது மாநில மாநாடு அண்மையில் நடைபெற்றது. இந்த மாநாட்டில் தமிழக முதல்வர் மு. க. ஸ்டாலினை UNCLE என கூறி கடுமையாக சாடி இருந்தார். இவரது கருத்துக்கு திமுகவை சேர்ந்தவர்கள் பதிலடி கொடுத்து வருகின்றனர்.

இந்த நிலையில், தமிழக வெற்றிக் கழக மாநாடு நடைபெற்ற மதுரை மாநகரில் விஜய்க்கு எதிராக திமுகவினர் பரபரப்பு போஸ்டரை ஒட்டி உள்ளனர். அந்த போஸ்டரில் "வாட் ப்ரோ, ஓவர் ப்ரோ, அடக்கி வாசிங்க ப்ரோ" என்ற வாசகம் இடம் பெற்றுள்ளது. திமுகவினர் ஒட்டி உள்ள இந்த போஸ்டரால் அந்த பகுதியில் பெரும் பரபரப்பு ஏற்பட்டுள்ளது.

தமிழக வெற்றிக் கழக மாநாட்டில் திமுகவையும், முதல்வர் மு. க. ஸ்டாலினியும் விஜய் கடுமையாக விமர்சித்து பேசி இருந்த நிலையில், அதற்கு பதிலடி கொடுக்கும் விதமாக மதுரை சேர்ந்த திமுகவினர், மதுரை மாநகர் முழுவதும் விஜய்க்கு எதிராக இந்த பரபரப்பு போஸ்டரை ஒட்டி உள்ளனர். எந்த போஸ்டர் மூலம் தமிழக வெற்றிக் கழகத் தலைவர் விஜய்க்கு, திமுகவினர் பதிலடி கொடுத்துள்ளதாக பார்க்கப்படுகிறது.

இதே போல,மதுரை மாநகர் மாவட்ட திமுக சார்பில் மற்றொரு பரபரப்பு போஸ்டர் ஒட்டப்பட்டுள்ளது. அதில், ஜனநாயக போர்க்களத்திற்கு கொள்கை வாளையும், சனாதனத்தை அறுத்தெறியும் வேலையும், பகுத்தறிவு என்னும் சுயமரியாதை ஈட்டியையும், சமூக நீதிக்காக கேடயங்களையும் வடித்து தந்திட்ட திராவிட பெருவேந்தரான உதயநிதியார் உடன்பிறவா தம்பிகள் உயிரோடு இருக்கும் வரை தமிழக வெற்றிக்கழக அணில் குஞ்சுகள் கூட்டத்தினரால் ஒரு மயிரும் புடுங்க முடியாது என்று அதில் அச்சிடப்பட்டுள்ளது.

மேலும் , திராவிடம் வெறும் சிந்தனை அல்ல வாழ்வியல். திமுக வெறும் அரசியல் கட்சி அல்ல அது தமிழ்நாட்டு மக்களின் சொத்து என்றும் வாசகம் அச்சிடப்பட்டுள்ளது. அந்த போஸ்டரில் தமிழக முதல்வர் மு. க. ஸ்டாலின் மற்றும் தமிழக துணை முதல்வர் உதயநிதி ஸ்டாலின் ஆகிய இருவரது படங்களும் பொறிக்கப்பட்டுள்ளது. ஏற்கனவே, விழுப்புரம் மாவட்டம், விக்கிரவாண்டி வி. சாலையில் தமிழக வெற்றிக் கழகம் சார்பில் நடைபெற்ற முதல் மாநாட்டில் விஜய் அரசியல் எதிரி திராவிட முன்னேற்றக் கழகம் என்று வெளிப்படையாக தெரிவித்து இருந்தார்.

அந்த மாநாடு முதல் தமிழக வெற்றிக் கழகம் சார்பில் நடைபெற்ற அனைத்து நிகழ்வுகளிலும் திமுக அரசை அதிக அளவில் த. வெ. க. தலைவர் விஜய் விமர்சித்து பேசி வருகிறார். தற்போது, மதுரையில் தமிழக வெற்றிக் கழகத் தலைவர் விஜய்க்கு எதிராக ஒட்டப்பட்டுள்ள போஸ்டரால், திராவிட முன்னேற்றக் கழகத்தினருக்கும், தமிழக வெற்றிக் கழகத்தின் கட்சியினருக்கும் இடையே ஒரு மோதல் போக்கை உருவாக்கியுள்ளது.