.png)
அடுத்து வருவதும் நமது ஆட்சி தான் - அமைச்சர் ராமச்சந்திரன்..!
விருதுநகரில் திமுக செயற்குழுக் கூட்டம் நேற்று தனியார் மண்டபத்தில் நடைபெற்றது. திமுக மாவட்டச் செயலாளர்களும் அமைச்சர்களுமான சாத்தூர் ராமச்சந்திரன், தங்கம் தென்னரசு ஆகியோர் தலைமை வகித்தனர். தென்காசி எம்.பி. ராணி, முன்னாள் எம்.பி. தனுஷ்குமார், எம்.எல்.ஏ.க்கள் சீனிவாசன், தங்கப்பாண்டியன், சிவகாசி மாநகாட்சி மேயர் சங்கீதா மற்றும் மாநில, மாவட்ட, ஒன்றிய, நகர நிர்வாகிகள் பலர் கலந்துகொண்டனர். இக்கூட்டத்தில், விருதுநகர் மாவட்டத்தில் உள்ள 7 சட்டமன்றத் தொகுதிகளுக்கும் நியமிக்கப்பட்டுள்ள பொறுப்பாளர்களாக விருதுநகர் தொகுதி பொறுப்பாளராக திருச்சுழி-முன்னாள் எம்.பி. பவானி, விருதுநகர்- மதுரை பாலா, சிவகாசி- செண்பக விநாயகம், அருப்புக்கோட்டை- மாரியப்பன் கென்னடி, சாத்தூர்- ஆனந்தன், ஸ்ரீவில்லிபுத்தூர்- சரவணன், ராஜபாளையம்- நல்ல சேதுபதி ஆகியோர் அறிமுகப்படுத்தப்பட்டனர்.
இக்கூட்டத்தில், பேசிய நிதியமைச்சர் தங்கம் தென்னரசு கூறியதாவது:-
முதல்வர் வருகை நமக்கு 2வது தீபாவளி. நவம்பர் 10ம் தேதி 2வது தீபாவளியை நாம் கொண்டாட உள்ளோம். அன்றைக்குத்தான் நமக்கு உண்மையான தீபாவளி. நமக்கு எழுச்சியையும் உற்சாகத்தையும் தரும் வகையில் முதல்வர் ஸ்டாலின் வர உள்ளார். இந்த முறை இதுவரை அளித்த வரவேற்புகளை எல்லாம் மிஞ்சும் அளவுக்கு மாபெரும் வரவேற்பு அளிக்க வேண்டும். கடந்த முறை 30 ஆயிரம் பேர் வரவேற்றோம். இந்த முறை இரண்டு மடங்கு அதிகமானோர் கூடி வரவேற்க வந்திட வேண்டும். உங்களை எல்லாம் நேரில் சந்தித்து உரையாட வேண்டும் என்ற முக்கிய நோக்கத்துடன் முதல்வர் வருகிறார்.
வரும் சட்டமன்றத் தேர்தலில் 200க்கும் மேற்பட்ட தொகுதிகளை வென்றெடுக்க வேண்டும் என முதல்வர் உத்தரவிட்டுள்ளார். அதற்கான முன்னோட்ட பணிகளை நாம் தொடங்க வேண்டும். தொகுதி பொறுப்பாளர்களுக்கு நீங்கள் ஒத்துழைக்க வேண்டும். வாக்காளர் சேர்ப்பு பணிகளையும் மேற்கொள்ள வேண்டும். இவ்வாறு அவர் கூறினார்.
அதனைத் தொடர்ந்து பேசிய வருவாய்த்துறை அமைச்சர் சாத்தூர் ராமச்சந்திரன் கூறியதாவது:-
இம்மாதம் 10ம் தேதி காலை 11 மணிக்கு தமிழக முதல்வர் விருதுநகர் வருகிறார். இம்முறை குறைந்தபட்சம் 60 ஆயிரம் பேர் திரண்டு வந்து முதல்வருக்கு வரவேற்பு அளிக்க வேண்டும். வரவேற்பு மிக பிரம்மாண்டமாக இருக்க வேண்டும். 7 தொகுதிகளிலும் வெற்றிபெறச் செய்வீர்கள் என்பதற்கு எடுத்துக்காட்டாக வரவேற்பு இருக்க வேண்டும். கட்சி நிர்வாகிகளையும் முதல்வர் சந்திக்க உள்ளார். 11ம் தேதி புதிதாக கட்டப்பட்ட மாவட்ட ஆட்சியர் அலுவலகத்தை திறந்து வைத்து, பட்டம்புதூரில் நடைபெறும் நிகழ்ச்சியில் பொதுமக்களுக்கு நலத்திட்ட உதவிகளை முதல்வர் வழங்குகிறார். நீங்கள் திரளாக பங்கேற்க வேண்டும்.
அடுத்து வருவதும் நமது ஆட்சிதான். 4 பேர், 5 பேர் பிரிந்து நிற்பதால் நமக்கு லாபம்தான். யார் எந்த வேஷம் பேட்டு வந்தாலும் திமுகவை யாரும் அசைக்க முடியாது. இன்னும் 25 ஆண்டுகள் தமிழகத்திற்கு ஆளப்போகும் கட்சி நாம்தான். அதற்கு வரும் சட்டமன்றத் தேர்தல் முக்கியமான தேர்தல். 200 தொகுதிகளில் நாம் வெற்றிபெற வேண்டும். இவ்வாறு அவர் கூறினார்