மயிலாடுதுறை மாவட்டத்துக்கு நவம்பர் 15ஆம் தேதி உள்ளூர் விடுமுறை..!

ஐப்பசி மாதத்தின் கடைசி நாள் கடைமுகம் என்று அழைக்கப்படுகிறது. ஐப்பசி மாதத்தில் அனைத்துப் புண்ணிய நதிகளும் புனிதத்தை அள்ளி வழங்கும் என்று கூறப்படுகிறது. இந்த மாதத்தில், காவிரி நீராடினால் புண்ணியம் ஏற்படும் என்று நம்பப்படுகிறது. ஐப்பசி கடைசி நாளன்று புனித நீராடுவதைத் தான் கடை முழுக்கு என்று கூறுகிறார்கள்.

மயிலாடுதுறையின் காவிரித்துறையின் பெயர் துலாக்கட்டம் எனப் போற்றப்படுகிறது. மயிலாடுதுறையின் பெருந் திருவிழாவின் பெயர் துலா உற்சவம் என்றே அழைக்கப்படுகிறது. துலா மாதத்தில் வரும் கடைமுழுக்கு தீர்த்தவாரித் திருவிழா, ஸ்ரீமயூரநாதர் அபயாம்பிகையின் வருடாந்திரத் திருவிழாவில், மிக முக்கியமான வைபவமாகப் போற்றப்படுகிறது.

ஐப்பசி மாத கடைசி நாளில் காவிரியில் புனித நீராடி மயூரநாதரை வழிபட்டால் நன்மை உண்டாகும் என்று பக்தர்களால் நம்பப்படுகிறது. மயிலாடுதுறையில் ஒவ்வொரு ஆண்டும் ஐப்பசி மாதம் நடைபெறும் காவிரி துலா உற்சவம் மிகவும் புகழ் பெற்றதாக விளங்குகிறது.

துலா உற்சவத்தின் முக்கிய விழாவான கடைமுகத் தீர்த்தவாரியை முன்னிட்டு மயிலாடுதுறை மாவட்டத்துக்கு நவம்பர் 15ஆம் தேதி உள்ளூர் விடுமுறை அறிவிக்கப்பட்டுள்ளது. அன்றைய தினம் மாவட்டத்தில் உள்ள பள்ளிகள், கல்லூரிகள், அரசு அலுவலகங்கள் இயங்காது.

நவம்பர் 15 உள்ளூர் விடுமுறையை ஈடு செய்யும் விதமாக நவம்பர் 23ஆம் தேதி சனிக்கிழமை வேலை நாளாக இருக்கும் என்று மயிலாடுதுறை மாவட்ட ஆட்சியர் மகாபாரதி தெரிவித்துள்ளார்.