GBU படத்துக்கு புதிய சிக்கல்: அனுமதியின்றி பாடல்களை பயன்படுத்தியதால் சட்டப்படி நடவடிக்கை எடுக்கப் போகிறேன் - இயக்குநர் கஸ்தூரிராஜா..!

தான் இசையமைத்த பாடல்களை என்னிடம் அனுமதி எதுவும் பெறாமல் பயன்படுத்திவிட்டார்கள் என்று கூறி வக்கீல் நோட்டீஸ் அனுப்பி வைத்தார் இசைஞானி இளையராஜா என்பது அனைவருக்கும் தெரியும். ரூ. 5 கோடி நஷ்டஈடும் கேட்டிருந்தார். ஆனால் அந்த பாடல்களின் உரிமத்தை வைத்திருக்கும் இசை நிறுவனங்களிடம் முறையே அனுமதி பெற்று தான் குட் பேட் அக்லி படத்தில் பயன்படுத்தினோம் என அதை தயாரித்த மைத்ரி மூவி மேக்கர்ஸ் நிறுவனம் விளக்கம் அளித்தது.

இந்நிலையில் மீண்டும் பாடல் சர்ச்சை கிளம்பியிருக்கிறது. தான் இயக்கவிருக்கும் பட வேலை தொடர்பாக சேலத்திற்கு சென்ற இடத்தில் செய்தியாளர்களிடம் பேசினார் தனுஷின் அப்பாவான இயக்குநர் கஸ்தூரிராஜா.

என் படங்களில் வந்த ஒத்த ரூபா தாரேன், தூதுவளை இலை அரைச்சு, பஞ்சு மிட்டாய் சேலை கட்டி ஆகிய பாடல்களை பயன்படுத்தியிருக்கிறார்கள். அடுத்தவர்களின் பட பாடலாச்சே என மரியாதை நிமித்தமாக கூட எதுவும் சொல்லவில்லை. இது தொடர்பாக சட்டரீதியாக நடவடிக்கை எடுக்கப்படும். தற்போது இளையராஜா, தேவா மாதிரி இசையமைக்கும் ஆட்கள் இல்லாத காரணத்தால் பழைய பாடல்களை பயன்படுத்துகிறார்கள் என்றார்.

கஸ்தூரிராஜா சொன்னதை கேட்ட அஜித் குமார் ரசிகர்களோ, எல்லாம் அனுமதி வாங்கியாச்சு என ஏற்கனவே சொல்லிவிட்டார்களே. இந்நிலையில் நீங்கள் என்ன சார் இப்போ வந்து நடிவடிக்கை எடுப்பேன் என்கிறீர்கள் என கேட்டிருக்கிறார்கள்.

ஏப்ரல் 10ம் தேதி ரிலீஸான குட் பேட் அக்லி படம் ரூ. 200 கோடிக்கு மேல் வசூல் செய்திருக்கிறது. ஆதிக் ரவிச்சந்திரன் இயக்கிய படங்களில் அதிகம் வசூல் செய்தது குட் பேட் அக்லி தான். இந்த ஆண்டு அஜித் நடிப்பில் விடாமுயற்சி, குட் பேட் அக்லி என இரண்டு படங்கள் வெளியான சந்தோஷத்தில் இருக்கிறார்கள் அவரின் ரசிகர்கள்.

குட் பேட் அக்லி படம் ரிலீஸாகி ஒரு மாதம் கழித்து கஸ்தூரிராஜா இப்படி பேசியிருக்கிறாரே என சினிமா வட்டாரத்தில் பரபரப்பாக பேசிக் கொண்டிருக்கிறார்கள். முன்னதாக அஜித் குமாரை வைத்து படம் இயக்க முயற்சி செய்து கொண்டிருக்கிறார் தனுஷ் என தகவல் வெளியானது.

இந்நிலையில் தனுஷ் அப்பா அஜித் குமார் படம் பற்றி பேசியது விவாத பொருளாகிவிட்டது. இளையராஜாவை போன்றே கஸ்தூரிராஜாவுக்கும் மைத்ரி மூவி மேக்கர்ஸ் நிறுவனம் பதில் அளிக்கும் என எதிர்பார்க்கப்படுகிறது.