விரைவில் சென்னையில் இருந்து யாழ்பாணத்திற்கு புதிய விமான சேவை..!

சென்னையில் இருந்து கொழும்புவுக்கு நாள்தோறும் ஏராளமானோர் விமான மூலம் பயணித்து வருகின்றனர். யாழ்பாணம் செல்ல வேண்டும் என்றால் கொழும்பு சென்றுதான் பின்னர் யாழ்பாணம் செல்ல முடியும்.

இயைதடுத்து அலையன்ஸ் ஏர் நிறுவனம் யாழ்பாணத்திற்கு காலை வேளையில் விமான சேவையை தொடங்கியது. இந்த விமான சேவை, திங்க, செவ்வாய், வியாழன், சனி என வாரத்தில் நான்கு நாட்கள் இயக்கப்படுகிறது. வாரத்தில் 4 நாட்கள் அதுவும் ஒரு முறை மட்டுமே யாழ்பாணத்திற்கு விமான சேவை வழங்கப்பட்ட நிலையில் தற்போது புதிய விமான சேவை தொடங்கப்படவுள்ளது.

சென்னையில் இருந்து நாள்தோறும் பிற்பகலில் யாழ்பாணத்திற்கு விமான சேவை அளிக்கப்பட உள்ளது. சென்னை - யாழ்ப்பாணம் இடையே இந்த புதிய விமான சேவையை செப்டம்பர் 1 ஆம் தேதி முதல் இண்டிகோ ஏர்லைன்ஸ் நிறுவனம் தொடங்க உள்ளது. இதில் டிக்கெட் கட்டணமாக 7,604 ரூபாய் நிர்ணயம் செய்யப்பட்டுள்ளது.

சென்னையில் விமான நிலையத்தில் இருந்து பகல் 1.55 மணிக்கு புறப்படும் இண்டிகோ ஏர்லைன்ஸ் விமானம், மாலை 3.10 மணிக்கு யாழ்பாணம் விமான நிலையத்தை சென்றடையும். மாலை 3. 55 மணிக்கு யாழ்பாணத்தில் இருந்து புறப்பட்டு மாலை 5.10 மணிக்கு மீண்டும் சென்னை விமான நிலையத்தை வந்தடையும் என தெரிவிக்கப்பட்டுள்ளது.