சுரங்க விபத்து: 41 பேரும் உள்ளே எப்படி இருக்கிறார்கள்? வெளியான வீடியோ..!

உத்தரகாண்ட் மாநிலம் உத்தர்காஷி பகுதியில் சார் தம் திட்டத்தின் கீழ் நெடுஞ்சாலை அமைக்கும் பணிகள் நடைபெற்று வருகின்றன.

இதன் ஒருபகுதியாக சில்க்யாரா அருகே 4.5 கிலோமீட்டர் நீளத்திற்கு சுரங்க வழிச்சாலை அமைக்க திட்டமிடப்பட்டது. இதன்மூலம் பத்ரிநாத், கேதர்நாத், கங்கோத்ரி, யமுனோத்ரி ஆகிய புனித தலங்களுக்கு எளிதில் சென்று வர முடியும். இந்நிலையில் சுரங்கம் தோண்டும் பணிகளின் போது நடந்த எதிர்பாராத விபத்து ஒட்டுமொத்த நாட்டையும் அதிர்ச்சிக்கு ஆளாக்கியுள்ளது. இந்த சூழலில் 41 தொழிலாளர்களையும் மீட்க மூன்று புறங்களில் இருந்து 5 விதமான முயற்சிகளை மீட்பு குழுவினர் முன்னெடுத்து வருகின்றனர்.

இந்நிலையில் எண்டோஸ்கோபி கேமரா மூலம் சுரங்கத்திற்குள் சிக்கியுள்ள தொழிலாளர்களின் முதல் வீடியோ கிடைத்துள்ளது. இது சமூக வலைதளங்களில் பகிரப்பட்டு பெரிதும் வைரலாகி வருகிறது. நேற்றைய தினம் 6 இஞ்ச் பைப் ஒன்று உள்ளே வெற்றிகரமாக செலுத்தப்பட்டது. இதன்மூலம் தான் இனிமேல் உணவுப் பொருட்கள் அனுப்பப்பட உள்ளன. 10 நாட்களுக்கு பின்னர் முதல்முறை தொழிலாளர்கள் கிச்சடி சாப்பிட்டுள்ளனர். இதுவரை உலர் பழங்கள், தண்ணீர் ஆகியவற்றை மட்டுமே சாப்பிட்டு வந்தது கவனிக்கத்தக்கது.

இந்நிலையில் இந்த பைப் மூலம் எண்டோஸ்கோபி கேமராவை அனுப்பி தொழிலாளர்களை பேச வைத்துள்ளது மீட்புக் குழு. உள்ளே அனைவரும் நலமுடன் இருப்பது தெரிய வருகிறது. மேலும் வாக்கி டாக்கி மூலம் தொழிலாளர்கள் உடன் மீட்பு குழுவினர் பேசுவது தொடர்பான வீடியோவும் வெளியாகியுள்ளது. அதில், கேமரா முன்பாக வந்து நின்று பேசுங்கள் என்று மீட்பு குழுவை சேர்ந்த அதிகாரி ஒருவர் கூறுகிறார். அதைக் கேட்டு தொழிலாளர்கள் முன்னே வந்து பேசுகின்றனர்.

இதுதொடர்பான வீடியோவை உத்தரகாண்ட் மாநில முதலமைச்சர் புஷ்கர் சிங் தாமி தனது எக்ஸ் வலைதளப் பக்கத்தில் பதிவிட்டுள்ளார். அதில், முதல் வீடியோ சில்க்யாரா சுரங்கத்தில் எண்டோஸ்கோபி பிளக்சி கேமரா மூலம் கிடைத்துள்ளது. அனைவரது உடல்நிலையும் விசாரிக்கப்பட்டது. தொழிலாளர்கள் முழுவதும் பாதுகாப்பாக இருக்கின்றனர். விரைவில் மீட்கப்பட்டு விடுவர் என்று தெரிவித்துள்ளார். இந்நிலையில் 6 இஞ்ச் பைப் வழியாக தொழிலாளர்களுக்கு மொபைல்கள், சார்ஜர்கள் ஆகியவற்றை அனுப்ப நடவடிக்கை எடுக்கப்படும் என்று மீட்பு குழுவை சேர்ந்த அதிகாரிகள் குறிப்பிட்டுள்ளனர்.

सिलक्यारा, उत्तरकाशी में निर्माणाधीन सुरंग के अंदर फँसे श्रमिकों से पहली बार एंडोस्कोपिक फ्लेक्सी कैमरे के माध्यम से बातचीत कर उनका कुशलक्षेम पूछा गया। सभी श्रमिक बंधु पूरी तरह सुरक्षित हैं। pic.twitter.com/vcr28EHx8g

— Pushkar Singh Dhami (@pushkardhami) November 21, 2023