நிம்மதி தரும் செய்தி : வலுவான புயலாக மாற வாய்ப்பில்லை - வானிலை ஆய்வு மையம் தகவல்..!

வங்கக்கடலில் நிலைகொண்டுள்ள ஆழ்ந்த காற்றழுத்த தாழ்வு மண்டலத்தின் தற்போதைய நிலவரம் குறித்து இந்திய வானிலை ஆய்வு மைய தென் மண்டல தலைவர் பாலச்சந்திரன் தெரிவித்து இருப்பதாவது; தென்மேற்கு வங்கக்கடல் பகுதியில் உருவான ஆழ்ந்த காற்றழுத்த தாழ்வு மண்டலம் நாகப்பட்டினத்திற்கு தென்கிழக்கே சுமார் 310 கிலோமீட்டர் தொலைவிலும், புதுச்சேரிக்கு தென்கிழக்கே சுமார் 410 கிலோமீட்டர் தொலைவிலும், சென்னைக்கு தென்கிழக்கே சுமார் 480 கிலோமீட்டர் தொலைவிலும் நிலைகொண்டுள்ளது.

இந்த ஆழ்ந்த காற்றழுத்த தாழ்வு மண்டலம் நேற்று மாலை மற்றும் இன்று காலைக்கு இடைப்பட்ட காலத்தில் தற்காலிக புயலாக ('பெங்கல்' புயல்) உருவெடுக்கும். இது வடக்கு- வடமேற்கு திசையில் நகர்ந்து நாளை (30-ம் தேதி) காரைக்காலுக்கும், மகாபலிபுரத்திற்கும் இடையே ஆழ்ந்த காற்றழுத்த தாழ்வு மண்டலமாக வலுவிழந்த நிலையில் கரையை கடக்கக்கூடும். வலுவான புயல் உருவாக வாய்ப்பு இல்லை. கரையை கடக்கும்போது மணிக்கு 50 முதல் 60 கிலோமீட்டர் வேகத்தில் காற்று வீசக்கூடும்.

இதன் காரணமாக அடுத்த 4 நாட்களுக்கு தமிழகம், புதுவையில் மிதமான மழை பெய்யக்கூடும். டெல்டா மாவட்டங்கள் மற்றும் வட தமிழகத்தில் இன்று கனமழை பெய்யக்கூடும். 30-ந்தேதி கரையை கடக்கும்போது விழுப்புரம், கடலூர், கள்ளக்குறிச்சியில் அதி கனமழையும், ராணிப்பேட்டை, திருவண்ணாமலை, பெரம்பலூர், அரியலூர், மயிலாடுதுறை, காரைக்கால், சென்னை, திருவள்ளூர், காஞ்சிபுரம் மாவட்டங்களில் மிக கனமழையும் பெய்ய வாய்ப்புள்ளது." இவ்வறு அவர் கூறினார்.