சென்னை தலைமைச் செயலகத்தில் முதல்வரின் புத்தாய்வு திட்டத்தில் பயிற்சி பெற்றவர்களுக்கு சான்றிதழ் வழங்கும் நிகழ்வு செயலகத்தில் நடைபெற்றது. இதில் துணை முதல்வர் உதயநிதி ஸ்டாலின் கலந்து கொண்டார். அப்போது தமிழ்த்தாய் வாழ்த்தை பாடிய அரசு ஊழியர்கள்கண்டமிதில் என்பதை கண்டமதில் என்றும் புகழ் மணக்க என்பதை திகழ் மணக்க என்றும் பாடினர்.

இதனால் அதிருப்தி அடைந்த துணை முதல்வர் உதயநிதி ஸ்டாலின் நிகழ்ச்சியின் நிறைவில் மீண்டும் தமிழ்த்தாய் வாழ்த்தை பாடுமாறு கூறினார். இரண்டாவது முறை பாடலை பாடியபோதும் கண்டமிதில் என்பதை கண்டமதில் என்று தவறாக பாடினர். ஆனால் தமிழ்த்தாய் வாழ்த்து தவறாக பாடப்படவில்லை, மைக் பிரச்சனை என கேள்வி விளக்கம் அளித்தார்.

இந்நிலையில் உதயநிதி ஸ்டாலினுக்கு பாஜக எம்எல்ஏ வானதி சீனிவாசன் கடும் கண்டனம் தெரிவித்துள்ளார். இதுதொடர்பாக பதிவிட்டுள்ள ட்வீட்டில், நீங்கள் துணை முதல்வரா அல்லது தமிழின எதிர்ப்பாளரா திரு உதயநிதி ஸ்டாலின் அவர்களே? என கேள்வி எழுப்பியுள்ளார்.

மேலும் நீங்கள் பங்கேற்கும் விழாவில் நமது தமிழ்த்தாய் வாழ்த்து சரியாக பாடுவதைக் கூட உறுதிசெய்ய தவறிய உங்களுக்கு துணை முதல்வராக நீடிப்பதற்கு என்ன தகுதி இருக்கிறது? இதுதான் நீங்கள் தமிழ் மொழியைக் கட்டிக் காக்கும் லட்சணமா? தவறாகப் பாடுவது காணொளியில் தெளிவாக தெரியும் போது, செய்த தவறை மறைக்க “Technical Fault” என்று புது விதமாக முட்டுக் கொடுப்பது ஏன்?

ஆளுநர் பங்கேற்ற விழாவில் தமிழ்த்தாய் வாழ்த்து தவறாகப் பாடப்பட்டுவிட்டது என கூறி தமிழக ஆளுநரின் மீது இனவெறி சாயத்தைப் பூசிய உங்கள் தகப்பனார், உங்கள் மீது என்ன நடவடிக்கை எடுக்கப் போகிறார்? தமிழ்த்தாய் வாழ்த்தை தவறாகப் பாடியதாக பொய்ப் புகார் கூறி ஆளுநரை திரும்ப பெறவேண்டும் என்று மத்திய அரசிடம் மல்லுக்கட்டினீர்களே, நீங்கள் பங்கேற்ற விழாவிலேயே தமிழ்த்தாய் வாழ்த்து தவறாகப் பாடப்பட்டுள்ளதே, உங்கள் பதவி பறிக்கப்படுமா? என்றுட் சரமாரியாக கேள்வி கணைகளை வீசியுள்ளார் வானதி சீனிவாசன்.

சமீபத்தில் ஆளுநர் பங்கேற்ற இந்தி மாத நிறைவு விழா கொண்டாட்டத்தில் தமிழ்த்தாய் வாழ்த்து தவறாக பாடப்பட்டது. இந்த விவகாரம் பெரும் சர்ச்சையான நிலையில் தற்போது உதயநிதி ஸ்டாலின் பங்கேற்ற நிகழ்ச்சியில் தமிழ்த்தாய் வாழ்த்து தவறாக பாடப்பட்டிருப்பது எதிர்க்கட்சிகளின் கேள்விக்கு உள்ளாகியுள்ளது.