வெளியான முக்கிய அறிவிப்பு..! விஜய் கட்சியில் சேர போகிறாரா ஓபிஎஸ் மகன்..?

முன்னாள் முதல்வர் ஓ.பன்னீர்செல்வம் பூலித்தேவன் சிலைக்கு மாலை அணிவித்து மரியாதை செலுத்தினார்.பின்னர் செய்தியாளர்களிடம் பேசிய ஓ.பன்னீர்செல்வம், “வரும் 2026 சட்டமன்ற தேர்தலில் உறுதியாக அதிமுகவை ஒருங்கிணைந்து எம்ஜிஆர், ஜெயலலிதா ஆட்சி நிறுவப்படும். தமிழகத்தில் தற்போது பல்வேறு பிரச்னைகள் நிகழ்வதோடு சட்டம் ஒழுங்கு சீர்கெட்டு கிடக்கிறது. எங்கு பார்த்தாலும் கஞ்சா உள்ளிட்ட போதைப் பொருட்கள் கிடைக்கிறது.

சென்னையில் பூலித்தேவருக்கு வெண்கல சிலை அமைக்க வேண்டும் என்று கோரிக்கை வந்துள்ளது. அவருக்கு வெண்கல சிலை அமைக்க தமிழக அரசை வலியுறுத்தி உரிய நடவடிக்கை எடுக்கப்படும்” என்று தெரிவித்தார்.

தமிழ்நாட்டில் இருந்து அண்டை மாநிலத்திற்கு கனிம வளம் எடுத்துச் செல்லப்பட்டு வருவதை சுட்டிக்காட்டி உள்ளதாகவும், அனைத்து அண்ணா திராவிட முன்னேற்றக் கழகத்தின் உரிமை மீட்பு குழு மாநிலம் தழுவிய போராட்டத்தை நடத்தும் என்றும் கூறினார். சென்னையில் கார் பந்தயம் நடைபெறுவது குறித்து கேள்வி எழுப்பியதற்கு கார் பந்தயங்களை நடைபெற கூடாது என்பது தவறான கருத்து என்று பதில் அளித்தார்.

தொடர்ந்து, விஜய் கட்சி ஆரம்பிக்கப் போகிறேன் என்று அறிவித்த உடனே எனது வாழ்த்தை தெரிவித்தேன். விஜய் கட்சியில் எனது மகன் இணையப் போகிறார் என்பது தவறான செய்தி. அது திட்டமிட்ட சதி என காட்டமாகத் தெரிவித்தார்.

முன்னதாக 2019 முதல் 2024 வரை தேனி தொகுதி அதிமுக மக்களவை உறுப்பினராக பதவி வகித்தவர் ஓ.பன்னீர்செல்வம் மகன் ரவீந்திரநாத். அதன்பிறகு ஓ.பன்னீர்செல்வம், ரவீந்திரநாத் உள்ளிட்டோர் அதிமுகவில் இருந்து வெளியேற்றப்பட்டனர்.

இதனால் அதிமுக தொண்டர்கள் உரிமை மீட்புக் குழுவை ஆரம்பித்து செயல்பட்டு வருகிறார்கள். 2024 மக்களவைத் தேர்தலில் ரவீந்திரநாத் போட்டியிடவில்லை. டிடிவி தினகரன் தேனியில் போட்டியிட்டார். தற்போது, விஜய் கட்சியில் அவர் சேரப்போகிறார் என்ற தகவல் வெளியான நிலையில், இவ்வாறாக மறுப்பு தெரிவித்துள்ளார் ஓபிஎஸ்.