தவெக கொடியில் சட்டத்திற்கு புறம்பான சின்னங்கள்..? போலீஸில் புகார்..!

சென்னை பனையூரில் உள்ள தனது கட்சி தலைமை அலுவலகத்தில் தமிழக வெற்றிக் கழகத்தின் கொடியை அறிமுகம் செய்தார் நடிகர் விஜய்.மேலும் கட்சியின் பாடலையும் வெளியிட்டார்.
 

சிவப்பு மஞ்சள் நிறத்தில் வடிவமைக்கப்பட்டுள்ள இந்த கொடியில் இரண்டு பிளிரும் போர் யானைகள், நடுவில் வாகை மலர், 28 நட்சத்திரங்கள் ஆகியவை இடம் பெற்றுள்ளன. இந்நிலையில் விஜய்யின் கொடியில் யானை படம் இடம்பெற்றிருப்பதற்கு தேசிய கட்சியான பகுஜன் சமாஜ் கட்சி எதிர்ப்பு தெரிவித்துள்ளது. தங்களின் கொடியில் இடம்பெற்றுள்ள யானை படத்தை விஜய் பயன்படுத்தி இருப்பதாகவும் இது தொடர்பாக தேர்தல் ஆணையத்தில் புகார் அளிக்க உள்ளதாகவும் தெரிவித்தது.

இந்நிலையில் சமூக ஆர்வலரான ஆர்டிஐ செல்வம் சென்னை காவல் ஆணையர் அலுவலகத்தில் விஜய் மீது தேச குற்ற வழக்கு பதிவு செய்ய வேண்டும் என புகார் அளித்துள்ளார். தமிழக வெற்றி கழக கொடியில் தேர்தல் விதிமுறைகள் மற்றும் சட்டத்திற்கு புறம்பான சின்னங்கள் இருப்பதாக ஆர்டிஐ செல்வம் அளித்துள்ள புகாரில் தெரிவிக்கப்பட்டுள்ளது. மேலும் கேரளா அரசின் போக்குவரத்து சின்னமான யானை, தேவெக கொடியில் இடம்பெற்றிருப்பதாகவும் புகாரில் தெரிவித்துள்ளார்.

மேலும் ஸ்பெயினை அவமதிக்கும் வகையில் அந்நாட்டு தேசிய கொடி போன்று வடிவமைக்கப்பட்டுள்ளதாகவும் குறிப்பிட்டுள்ள ஆர்டிஐ செல்வம், தவெக தலைவர் விஜய் மீது தேச குற்ற வழக்கு பதிவு செய்ய வேண்டும் எனவும் கோரிக்கை விடுத்துள்ளார். தமிழக வெற்றிக் கழகத்தின் கொடி நேற்றுதான் அறிமுகப்படுத்தப்பட்ட நிலையில், அடுத்தடுத்து புகார்களும் சர்ச்சைகளும் எழுவது அக்கட்சி தொண்டர்களை கவலை அடைய செய்துள்ளது.

இதனிடையே தமிழக வெற்றிக் கழககத்தின் மாநாடு அடுத்த மாதம் நடைபெற உள்ளதாக தகவல் வெளியாகியுள்ளது.