.png)
காளியம்மாள் வேறு கட்சிக்கு செல்ல விரும்பினால் செல்லலாம்: சீமான் பேட்டி..!
கடந்த சில நாட்களாக நாம் தமிழர் கட்சியின் பெண்கள் பாசறை மாநில ஒருங்கிணைப்பாளர் காளியம்மாள் கட்சியில் இருந்து விலக உள்ளதாக தகவல் வெளியான வண்ணம் உள்ளது.
இந்நிலையில் அடுத்த மாதம் மணப்பாட்டில் நடைபெறும் உறவுகள் சங்கமம் என்ற நிகழ்ச்சியில் பங்கேற்கும் காளியம்மாளின் பெயர் வெறும் சமூக செயற்பாட்டாளர் என குறிப்பிடப்பட்டுள்ளது. அந்த நிகழ்ச்சியில் பங்கேற்கும் திமுக மற்றும் காங்கிரஸ் பிரமுகர்களின் பெயர்கள் கட்சிபொறுப்புடன் இடம்பெற்றுள்ள நிலையில் காளியம்மாளின் பெயருடன் கட்சி மற்றும் அவர் வகிக்கும் பொறுப்பு எதுவும் இடம்பெறவில்லை.
இதனால் அவர் கட்சியில் இருந்து விலகுகிறாரா என்ற கேள்வி எழுந்த நிலையில் கட்சியில் இருந்து விலகுவது குறித்த முடிவை விரைவில் அறிவிப்பேன் என விளக்கம் அளித்துள்ளார் காளியம்மாள். இந்நிலையில் நாம் தமிழர் கட்சியின் தலைமை ஒருங்கிணைப்பாளர் சீமான், காளியம்மாள் விலகல் முடிவு குறித்து கருத்து தெரிவித்துள்ளார்.
மதுரையில் செய்தியாளர்களை சந்தித்த சீமானிடம் காளியம்மாள் விலகல் குறித்து கேள்வி எழுப்பப்பட்டது. அதற்கு பதில் அளித்த சீமான், இலையுதிர் காலம் போல எங்கள் கட்சிக்கு இது களையுதிர் காலம் போன்றது. யார் வேண்டுமானாலும் கட்சியிலிருந்து செல்லலாம். அது அவர்களின் தனிப்பட்ட முடிவு. கட்சியில் இருப்பதற்கும் விலகுவதற்கும் காளியாம்மாளுக்கு முழு சுதந்திரம் உள்ளது.
காளியம்மாள் விலகினால் விலகட்டும், வாழ்த்துகள்.. இவ்வாறு சீமான் தெரிவித்தார். இதனிடையே காளியம்மாள் திமுக அல்லது அதிமுக கட்சியில் இணைவார் என கூறப்பட்ட நிலையில் அவர் விஜய்யின் தமிழக வெற்றிக் கழகம் கட்சியில் இணைய உள்ளதாக தகவல் வெளியாகியுள்ளது.