என்னை விட பாஜக அதிக வாக்குகளை வென்றுவிட்டால் கட்சியை கலைத்துவிட்டு செல்கிறேன் - சீமான்..!

நாடாளுமன்றத் தேர்தல் 7 கட்டங்களாக நடைபெற்று வருகிறது. இதில் 5 கட்ட தேர்தல் முடிவடைந்த நிலையில், இன்று 6-வது கட்ட வாக்குப்பதிவு நடைபெறுகிறது. தமிழகத்தில் ஒரே கட்டமாக தேர்தல் நடந்து முடிந்துவிட்டது. தேர்தல் முடிவுகள் வரும் ஜூன் 4-ம் தேதி வெளியாகவுள்ளது.

இதனிடையே, அண்மையில் செய்தியாளர்களிடம் பேசிய தமிழக பாஜக தலைவர் அண்ணாமலை, "நாடாளுமன்றத் தேர்தலில் தமிழ்நாட்டில் 3-வது பெரிய கட்சியாக பாஜக உருவாகும். பாஜக தெற்கில் அசுர வளர்ச்சி பெற்று வருகிறது" எனக் கூறினார். இந்நிலையில், அண்ணாமலை இவ்வாறு கூறியது குறித்து சீமானிடம் நிருபர்கள் கேள்வியெழுப்பினர். அதற்கு பதிலளித்து சீமான் கூறியதாவது:

ஆண் மகன் என்றால் தனியாக வர வேண்டும். தனியாக போய் சண்டை போட வேண்டும். ஒத்தைக்கு ஒத்தையாக களத்தில் நிக்கணும். அவன் தான் ஆம்பளை. அவன் தான் வீரன். ஜூன் 4-ம் தேதிக்கு பிறகு அண்ணாமலையை வர சொல்லுங்கள். பாஜக தனித்து தேர்தலில் போட்டியிடட்டும். நானும் போட்டியிடுகிறேன். என்னை விட பாஜக அதிக வாக்குகளை வென்றுவிட்டால், உடனடியாக கட்சியை கலைத்துவிட்டு செல்கிறேன். அண்ணாமலைக்கு மோதி பார்க்க தைரியம் இருக்கிறதா?" என்று சீமான் கேள்வியெழுப்பினார்.