சூடுபிடிக்கும் உள்ளாட்சித் தேர்தல்: இன்று முதல் வேட்புமனு தாக்கல் தொடங்குகிறது !!

தமிழத்தில் புதிதாக உருவாக்கப்பட்ட 9 மாவட்டங்களுக்கான உள்ளாட்சித் தேர்தல் தேதி அண்மையில் அறிவிக்கப்பட்டது. அக்டோபர் 6 மற்றும் 9ஆம் தேதிகளில் இரண்டு கட்டங்களாக தேர்தல் நடைபெறவுள்ளது. அதன்படி திருநெல்வேலி, விழுப்புரம், காஞ்சிபுரம், வேலூர், தென்காசி, கள்ளக்குறிச்சி, செங்கல்பட்டு, ராணிப்பேட்டை, திருப்பத்தூர் ஆகிய 9 மாவட்டங்களுக்கு உள்ளாட்சித் தேர்தல் நடைபெறும் என மாநில தேர்தல் ஆணையர் பழனிகுமார் அறிவித்தார்.

உள்ளாட்சித் தேர்தல் நடைபெறும் இடங்களுக்கு இன்று முதல் வேட்புமனு தாக்கல் தொடங்குகிறது. முதல்கட்ட தேர்தலில் செங்கல்பட்டு மாவட்டத்தில் உள்ள இலத்தூர், திருக்கழுக்குன்றம், திருப்போரூர் உள்ளிட்ட 4 ஊராட்சி ஒன்றியங்களிலும், காஞ்சிபுரம் மாவட்டம் உத்திர மேரூர், வாலாஜாபாத் உள்ளிட்ட 3 ஊராட்சி ஒன்றியங்களிலும் வாக்குப்பதிவு நடைபெறுகிறது.

விழுப்புரம் மாவட்டத்தில் செஞ்சி, விக்கிரவாண்டி உள்ளிட்ட 7 ஊராட்சி ஒன்றியங்களிலும், கள்ளக்குறிச்சி மாவட்டத்தில் ரிஷிவந்தியம், திருக்கோவிலூர், உளுந்தூர்பேட்டை உள்ளிட்ட 4 ஊராட்சிகளிலும் அக்டோபர் 6-ல் வாக்குப்பதிவு நடத்தப்படுகிறது. வேலூர் மாவட்டத்தை பொறுத்தவரை குடியாத்தம், காட்பாடி, பேர்ணாம்பட்டு உள்ளிட்ட 4 ஊராட்சிகளிலும், ராணிப்பேட்டை மாவட்டத்தில் ஆற்காடு, வாலாஜா, திமிரி ஆகிய 3 ஊராட்சிகளிலும் அக்டோபர் 6-ல் வாக்குப்பதிவு நடைபெறுகிறது.

திருப்பத்தூர் மாவட்டத்தில் நாட்றம்பள்ளி, சோலையார்பேட்டை உள்ளிட்ட 4 ஊராட்சி ஒன்றியங்களிலும் முதல் கட்டத்தில் வாக்குப்பதிவு நடத்தப்பட உள்ளது. திருநெல்வேலி மாவட்டத்தில் அம்பாசமுத்திரம், சேரன்மகாதேவி, பாளையங்கோட்டை உட்பட 5 ஊராட்சி ஒன்றியங்களிலும், தென்காசி மாவட்டத்தில் ஆலங்குளம், கடையம், கீழப்பாவூர் உள்ளிட்ட 5 ஊராட்சி ஒன்றியங்கள் என, முதல்கட்டத்தில் 39 ஊராட்சி ஒன்றியங்களில் அக்டோபர் 6-ல் வாக்குப்பதிவு நடத்தப்படும் என அறிவிக்கப்பட்டுள்ளது.

அக்டோபர் 9ஆம் தேதி இரண்டாவது கட்டத் தேர்தல் நடைபெறுகிறது. இதில், 35 ஊராட்சி ஒன்றியங்களுக்கு உட்பட்ட பகுதிகளில் வாக்குப்பதிவு நடைபெறும் என்று மாநிலத் தேர்தல் ஆணையம் அறிவித்துள்ளது. இதன்படி, செங்கல்பட்டு மாவட்டத்தில் அச்சிறுப்பாக்கம், மதுராந்தகம் உள்ளிட்ட 4 ஊராட்சி ஒன்றியங்களில் இரண்டாவது கட்டத்தில் வாக்குப்பதிவு நடைபெற உள்ளது.

காஞ்சிபுரம் மாவட்டத்தில் குன்றத்தூர், திருப்பெரும்புதூர் ஊராட்சி ஒன்றியங்களிலும், விழுப்புரம் மாவட்டத்தில் காணை, மேல்மலையனூர் உள்ளிட்ட 6 பகுதிகளிலும் வாக்குப்பதிவு நடைபெறும். கள்ளக்குறிச்சி மாவட்டத்தில் கள்ளக்குறிச்சி, சங்கராபுரம் உள்ளிட்ட 5 ஊராட்சி ஒன்றியங்களிலும், வேலூர் மாவட்டத்தில் அணைக்கட்டு, கணியம்பாடி, வேலூர் ஊராட்சி ஒன்றியங்களிலும் வாக்காளர்கள் தங்களது ஜனநாயக கடமையை நிறைவேற்ற உள்ளனர்.

ராணிப்பேட்டை மாவட்டத்தில் அரக்கோணம், சோளிங்கர் உள்ளிட்ட 4 பகுதிகளிலும், திருப்பத்தூரில் ஆலங்காயம், மாதனூர் ஆகிய பகுதிகளிலும், திருநெல்வேலி மாவட்டத்தில் நான்குநேரி, ராதாபுரம் உள்ளிட்ட 4 ஊராட்சி ஒன்றியங்களிலும் வாக்குப்பதிவு நடைபெறும்.
தென்காசி மாவட்டத்தில் 5 ஊராட்சி ஒன்றியங்களுக்கு இரண்டாவது கட்டத்தில் வாக்குப்பதிவு நடைபெறும் என்று தேர்தல் ஆணையம் அறிவித்துள்ளது.

newstm.in