2024–25 நிதியாண்டுக்கான (மதிப்பீட்டு ஆண்டு 2025–26) வருமான வரி அறிக்கைகளை (ITR) தாக்கல் செய்வதற்கான கடைசி தேதி செப்டம்பர் 15ஆம் தேதி வரை நீட்டிக்கப்பட்டுள்ளது.



ITR படிவங்களில் புதிய மாற்றங்கள் ஏற்பட்டதால் இந்த அறிவிப்பு வெளியாகியுள்ளது. அதாவது, இந்த ஆண்டு வெளியிடப்பட்ட ITR படிவங்களில் பல மாற்றங்கள் செய்யப்பட்டுள்ளன. அதேபோல, படிவங்களுக்கு ஏற்ப போர்ட்டலைப் புதுப்பிக்கவும், அதைச் சோதிக்கவும் கூடுதல் நேரம் எடுக்கிறது. 2025 மே மாதம் வரை TDS தரவு ஜூன் மாதத்திற்கு முன்பு தெரியாது. இதனால் வருமான வரி கணக்கை சரியான நேரத்தில் தாக்கல் செய்வது கடினம். இதனால் தான் கால அவகாசம் நீட்டிக்கப்பட்டுள்ளது. இதற்கு முன்பு ஜூலை 31 கடைசி தேதியாக இருந்தது.

வருமான வரி தாக்கல் செய்வதற்கான கால அவகாசத்தை நீட்டிப்பது குறித்து மத்திய நேரடி வரிகள் வாரியம் (CBDT) அதிகாரப்பூர்வ அறிவிப்பை வெளியிட்டுள்ளது. தற்போது கால அவகாசம் நீட்டிக்கப்பட்டு உள்ளதால் வருமான வரி செலுத்துவோருக்கு ஆவணங்கள் மற்றும் படிவங்களைப் பூர்த்தி செய்து சமர்ப்பிக்க அதிக நேரம் கிடைக்கும். வருமானத்தில் குறைவான பிழைகள் இருக்கும். இது துல்லியமான மற்றும் வெளிப்படையான தாக்கல் செய்வதை உறுதி செய்யும் என்று கூறப்படுகிறது. படிவத்தை மாற்றவும் TDS தரவை பிரதிபலிக்கவும் அமைப்புக்கு போதுமான நேரம் கிடைக்கும் என்று எதிர்பார்க்கப்படுகிறது.

இந்த நீட்டிப்பு வரி செலுத்துவோரின் கவலைகளை நிவர்த்தி செய்யும் எனவும், வருமானச் செயல்முறையின் தரத்தை பராமரிக்கவும் உதவும் என்றும் மத்திய நேரடி வரிகள் வாரியம் கூறியுள்ளது.

வருமான வரித் துறை சமீபத்தில் 2025-26 மதிப்பீட்டு ஆண்டுக்கான ஏழு வருமான வரி படிவங்களையும் அறிவித்தது. சிறு மற்றும் நடுத்தர வரி செலுத்துவோரால் தாக்கல் செய்யப்படும் ஐடிஆர் படிவங்கள் 1 மற்றும் 4 ஏப்ரல் 29ஆம் தேதியன்று அறிவிக்கப்பட்ட நிலையில், அறக்கட்டளைகள் மற்றும் தொண்டு நிறுவனங்களால் தாக்கல் செய்யப்படும் ஐடிஆர்-7 மே 11ஆம் தேதி அறிவிக்கப்பட்டது.

பட்டியலிடப்பட்ட பங்குகளில் இருந்து மூலதன ஆதாய வருமானத்தைப் புகாரளிப்பது தொடர்பாக ஏப்ரல் 29ஆம் தேதின்று அறிவிக்கப்பட்ட ஐடிஆர்-1 மற்றும் ஐடிஆர்-4 படிவங்களில் ஒரு முக்கியமான மாற்றம் அறிமுகப்படுத்தப்பட்டுள்ளது. சம்பளம் வாங்கும் தனிநபர்கள் மற்றும் அனுமான வரிவிதிப்பு திட்டத்தின் கீழ் உள்ளவர்கள், ஒரு நிதியாண்டில் ரூ. 1.25 லட்சம் வரை நீண்ட கால மூலதன ஆதாயங்களை (LTCG) கொண்டவர்கள், முறையே ஐடிஆர்-1 மற்றும் ஐடிஆர்-4 ஐ தாக்கல் செய்ய முடியும்.

முன்னதாக, அத்தகைய நபர்கள் அல்லது நிறுவனங்கள் ஐடிஆர்-2 படிவத்தை தாக்கல் செய்ய வேண்டியிருந்தது. வருமான வரி சட்டத்தின் கீழ், பட்டியலிடப்பட்ட பங்குகள் மற்றும் பரஸ்பர நிதிகளின் விற்பனையிலிருந்து ரூ.1.25 லட்சம் வரையிலான எல்டிசிஜிக்கு வரி விலக்கு அளிக்கப்படுகிறது. ஆண்டுக்கு ரூ.1.25 லட்சத்திற்கு மேல் கிடைக்கும் லாபம் 12.5 சதவீத வரிக்கு உட்பட்டது என்பது குறிப்பிடத்தக்கது.