குட் நியூஸ்.. வீடு வீடாக விநியோகிக்கும் சேவையை தொடங்கும் தமிழக அரசு..!

பொது விநியோக முறையின் (PDS) கீழ் அத்தியாவசியப் பொருட்களை வீடு வீடாக விநியோகிக்கும் சேவையை தமிழக அரசு அறிமுகப்படுத்த உள்ளது. இந்தத் திட்டம் ஜூலை அல்லது ஆகஸ்ட் மாதத்திற்குள் தொடங்கப்படும் என்று எதிர் பார்க்கப்படுகிறது. 

ஆரம்ப கட்டத்தில் இந்தத் திட்டம் மாநிலத்தில் உள்ள மொத்தம் 2.21 கோடி அட்டைதாரர்களில் சுமார் 15 லட்சம் ரேஷன் அட்டைதாரர்களை உள்ளடக்கும். 70 வயது அல்லது அதற்கு மேற்பட்டவர்கள் அல்லது நியாய விலைக் கடைகளில் இருந்து பொருட்களை சேகரிக்க வேறு எந்த நபரும் இல்லாத மாற்றுத்திறனாளிகள் உள்ள வீடுகளில் கவனம் செலுத்தப்படும். முன்னுரிமை குடும்ப அட்டை (PHH) மற்றும் முன்னுரிமையற்ற குடும்ப அட்டை (NPHH) வைத்திருக்கும் இரு அட்டைதாரர்கள் தகுதியுடையவர்கள்.

அரிசி, சர்க்கரை, கோதுமை, பாமாயில், துவரம் பருப்பு உள்ளிட்ட அத்தியாவசியப் பொருட்கள், கூட்டுறவுத் துறையால் இயக்கப்படும் மேக்ஸி லாரிகள், மினி லாரிகள் மற்றும் வேன்கள் போன்ற வாகனங்கள் மூலம் பயனாளிகளின் வீட்டு வாசலுக்கு டெலிவரி செய்யப்படும்.

2021 முதல், மாற்றுத்திறனாளிகளில் புதிய ரேஷன் கார்டு விண்ணப்பித்தவர்கள் முன்னுரிமை குடும்ப அட்டை (PHH) பிரிவின் கீழ் சேர்க்கப்பட்டுள்ளனர். அத்தியாவசியப் பொருட்களை வீடு வீடாக விநியோகிக்கும் சேவை திட்டம் என்பது அட்டை வகையைப் பொருட்படுத்தாமல், அனைத்து மாற்றுத்திறனாளிகளும் வீட்டு வாசலில் டெலிவரி பெறுவதை உறுதி செய்கிறது

இந்த முயற்சி ஒவ்வொரு மாதத்தின் முதல் வாரத்திற்குள் மொத்தமாக விநியோகங்களைச் செயல்படுத்துவதன் மூலம் கிடங்கின் செயல்திறனை மேம்படுத்தும் என்றும், இதனால் சேமிப்பு இழப்புகளைக் குறைக்கும் என்றும் எதிர்பார்க்கப்படுகிறது.

மேலும் தமிழகத்தில் 18.45 லட்சத்திற்கும் மேற்பட்ட குடும்பங்கள் அந்த்யோதயா அன்ன யோஜனா (AAY) அட்டைகளை வைத்திருக்கின்றன, இதனால் அவர்களுக்கு மாதத்திற்கு 35 கிலோ அரிசி கிடைக்கும். சில AAY பயனாளிகளும் புதிய திட்டத்தின் கீழ் தகுதி பெறலாம்.