பூண்டு தக்காளி ரேஷன் கடைகளில் விற்பனை செய்ய வேண்டும் - முத்தரசன்..!

இந்தியக் கம்யூனிஸ்ட் கட்சியின் தமிழ்நாடு மாநில நிர்வாகக்குழு மற்றும் மாவட்டச் செயலாளர்கள் கூட்டம் திருச்சியில முத்தரசன் தலைமையில் நடைபெற்றது.

அதில் நிறைவேற்றப்பட்ட தீர்மானத்தில், “நாடு முழுவதும் அதிகரித்து வரும் அத்தியாவசிய பொருட்களின் விலைவாசி கடந்த 14 மாதங்களில் இல்லாத அளவிற்கு மிக உயர்ந்த அளவை எட்டியுள்ளது. குறிப்பாக காய்கறிகள், சமையல் எண்ணெய் வகைகளின் விலைகள் உயர்ந்து, அவைகள் அடித்தட்டு மக்களின் கைக்கு எட்டா பொருளாகி வருகிறது” என்று தெரிவிக்கப்பட்டுள்ளது.

சமையலுக்கு முக்கியமாக தேவைப்படும் பூண்டு விலை கிலோ 420 ரூபாய்க்கும், தக்காளி விலை கிலோ 80 ரூபாய்க்கும், வெங்காயம் கிலோ 70 ரூபாய்க்கும் மேலாக உயர்த்துள்ளதாகவும், உணவு தானிய விலை உயர்வை கட்டுப்படுத்துவதில் பாஜக ஒன்றிய அரசு படுதோல்வி அடைந்து வருகிறது என்றும் குறிப்பிடப்பட்டுள்ளது.

மேலும், “ வேலையின்மையையும், வேலையிழப்புகளையும் தீவிரப்படுத்தி வரும் நவதாராளமயக் கொள்கையின் விளைவாகவே விலைவாசி உயர்ந்து வருகிறது. மாத வருமானப் பிரிவினரும் தினக்கூலித் தொழிலாளர்களும் விலைவாசி உயர்வை எதிர்கொள்ள, பூண்டு, தக்காளி, வெங்காயம் உள்ளிட்ட காய்கறிகளை தமிழ்நாடு அரசு கொள்முதல் செய்து, பொது விநியோக திட்டத்தின் மூலம் நியாய விலையில் மக்களுக்கு வழங்க வேண்டும்” என்று இந்திய கம்யூனிஸ்ட் கட்சி வலியுறுத்தியுள்ளது.