நீலகிரி மற்றும் கொடைக்கானல் செல்லும் சுற்றுலா பயணிகள் இ-பாஸ் எடுப்பது கட்டாயம்..!

நீலகிரி மற்றும் கொடைக்கானல் சுற்றுலா தலங்களுக்குச் செல்ல இ-பாஸ் முறை மே மாதம் முதல் நடைமுறையில் உள்ளது. ஒரே நாளில் அதிகப்படியான சுற்றுலா பயணிகள் குவிவதால் ஏற்படும் பிரச்னைகளைத் தடுக்கவே இந்த நடைமுறை கொண்டு வரப்பட்டது.மே மாதம் நடைமுறைப்படுத்தப்பட்ட இந்த நடைமுறை ஜூன் 30-ஆம் தேதி வரை பின்பற்றப்படும் என உத்தரவிடப்பட்டிருந்த நிலையில், இது செப்.30 வரை நீட்டிக்கப்பட்டுள்ளது.

இது தொடர்பான விசாரணை நேற்று சென்னை உயர் நீதிமன்றத்தில் விசாரணைக்கு வந்தது. அப்போது, நீலகிரி மற்றும் கொடைக்கானலுக்குச் செல்லும் வாகனங்கள் குறித்து ஐஐடி, ஐஐஎம் மையங்கள் தரப்பில் ஆய்வு செய்ய விருப்பதாகவும், இ-பாஸ் நடைமுறையை நீட்டிக்கலாம் என்றும் சென்னை உயர் நீதிமன்றத்தில் தமிழக அரசு பதில் அளித்துள்ளது. இதையடுத்து, செப்.30 வரை இ-பாஸ் நீட்டிக்கப்பட்டுள்ளது.

இணையதளத்தின் வழியே இ-பாஸ் பெறுவதுடன், அதில் ஏதேனும் சந்தேகங்கள் ஏற்பட்டால் நீலகிரி மாவட்ட நிர்வாகத்தை 1077 என்ற எண்ணிலும், கொடைக்கானல் செல்ல இ-பாஸ் பெறும் போது, அதில் விளக்கங்கள் பெற நேர்ந்தால் திண்டுக்கல் மாவட்ட நிர்வாகத்தை 0451 - 2900233, 9442255737 ஆகிய எண்களிலும் தொடர்பு கொள்ளலாம் என்றும் எண்கள் அறிவிக்கப்பட்டுள்ளன.