சென்னையில் நடத்தப்படும் அறிவியல் விழா - இந்த 3 நாட்கள் மிஸ் பண்ணிடாதீங்க..!

சென்னையில் நடத்தப்படும் அறிவியல் விழாவும், அறிவியல் நகரமும் முக்கியமானவை. தமிழக அரசின் உயர்கல்வித் துறையின் அங்கமான ”அறிவியல் நகரம்” பொதுமக்கள் மற்றும் மாணவர்களுக்கு இடையே அறிவியல் விழிப்புணர்வு ஏற்படுத்துதல் மற்றும் அறிவியல் கருத்துக்களை பரப்பி அறிவியல் அறிவினை மேம்படுத்துவதற்காக பல நிகழ்ச்சிகளை நடத்தி வருகிறது. இந்த நிகழ்ச்சிகளில் மிக முக்கியமான ஒன்று சென்னை அறிவியல் விழா.

சென்னை அறிவியல் விழா 2008 ஆம் ஆண்டு முதல் தமிழக அரசின் ஆதரவுடன் மிகவும் சிறப்பாக நடத்தப்பட்டு வருகிறது. இந்த விழாவை வெற்றிகரமாக நடத்துவதற்காக முக்கிய உயர்கல்வி மற்றும் ஆராய்ச்சி நிறுவனங்களான இந்திரா காந்தி அணு ஆற்றல் ஆராய்ச்சி மையம், அண்ணா பல்கலைக்கழகம், சென்னை பல்கலைக்கழகம், தமிழ்நாடு அறிவியல் மற்றும் தொழில்நுட்ப மையம், இந்திய தொழில்நுட்ப நிறுவனம் (IIT Madras),

தமிழ்நாடு கால்நடை மருத்துவ மற்றும் கால்நடை அறிவியல் பல்கலைக்கழகம், தமிழ்நாடு மீன்வளப் பல்கலைக்கழகம், மத்திய தோல் ஆராய்ச்சி நிறுவனம், இந்திய மருத்துவ இயக்குநரகம், புற்றுநோய் நிறுவனம் போன்ற அறிவியலில் தலை சிறந்து விளங்கும் நிறுவனங்கள் வருகை புரியும் அனைத்து தரப்பினர்களுக்கும் காட்சி பொருட்களை வைத்து காட்சி கூடங்கள் அமைக்கப்பட்டுள்ளன.

சென்னை அறிவியல் விழாவில் பிரம்மாண்டமான அறிவியல் கண்காட்சி அரங்குகள் மற்றும், அறிவியல் செய்முறை விளக்கங்கள், மற்றும் அறிவியல் லேசர் ஒளி, ஒலி காட்சி ஆகியன இடம்பெறுகின்றன.

சென்னை அறிவியல் விழாவினை 24.09.2024 அன்று மாலை 1.30 மணி அளவில் மாண்புமிகு உயர் கல்வித் துறை அமைச்சர் பொன்முடி அவர்கள் தொடங்கி வைக்கவுள்ளார். இந்த விழா 24.09.2024 முதல் 26.09.2024 வரை பெரியார் அறிவியல் மற்றும் தொழில் நுட்ப மைய (பிர்லா கோளரங்கம்) வளாகத்தில் காலை 10.00 மணி முதல் மாலை 5 மணி வரை பார்வையாளர்களுக்காக நடைபெறும் என்று தெரிவிக்கப்பட்டுள்ளது.