இன்று மறக்காம காகத்திற்கு சாதம் வைய்யுங்க..!

மகாளய அமாவாசை அன்று ஆண்கள் ஆற்றங்கரைக்கு சென்று தர்ப்பணம் கொடுக்க வேண்டும். காலையில் அவர்கள் தர்ப்பணம் கொடுத்து விட்டு வருவதற்குள், பெண்கள் வழக்கமாக செய்வது போல் சாதம் வடித்து வைக்கக் கூடாது. அன்றைய தினம் வெண்கலம், எவர்சில்வர் ஏதாவது ஒரு பாத்திரத்தில் தான் சமைக்க வேண்டும். கண்டிப்பாக பித்தளை பாத்திரத்தில் சாதம் வடிக்கக் கூடாது. தனியாக ஒரு அளவிற்கு அரிசியை எடுத்து, வேக வைத்து, வடித்து சாதம் செய்து வைத்துக் கொள்ள வேண்டும். இந்த சாதத்துடன் கருப்பு எள் கலந்து ஒரு உருண்டையாக பிடித்து வைத்துக் கொள்ள வேண்டும்.

தர்ப்பணம் கொடுத்து விட்டு திரும்பும் போது இரண்டு அல்லது நான்கு தர்ப்பைகளை ஆண்கள் வீட்டிற்கு வாங்க வர வேண்டும். வீட்டிற்கு வந்ததும் ஒரு தாம்பாலத்தில், கையில் எள் வைத்து, தண்ணீர் ஊற்றி இறைக்க வேண்டும். பிறகு வீட்டின் மேற்பகுதிக்கு சென்று, தர்ப்பை புற்களை கிழக்கு-மேற்காக இரண்டையும், வடக்கு தெற்காக இரண்டையும் வைத்து அதற்கு நடுவில் எள் கலந்த சாதத்தை வைத்து, கையில் தண்ணீர் எடுத்து நைவேத்தியம் செய்து விட்டு, காகத்தை அழைத்து விட்டு வந்து விட வேண்டும். அந்த சாதத்தை காகம் சாப்பிடுகிறதா என கண்காணிக்க வேண்டிய அவசியம் கிடையாது.

காகத்திற்கு இந்த முறையில் சாதம் வைத்த பிறகு முன்னோர்களுக்கு அவர்களுக்கு பிடித்த உணவுகளை படைத்து, படையல் இட வேண்டும். தீபாராதனை காட்டி, தண்ணீர் விட்டு நைவேத்தியம் செய்த பிறகு தான் நாம் சாப்பிட்டு விரதத்தை நிறைவு செய்ய வேண்டும். மகாளய அமாவாசை அன்று ஒரு வேளை மட்டும் தான் உணவு அருந்த வேண்டும். காலையில் கண்டிப்பாக உபவாசம் இருந்து தான் தர்ப்பணம் கொடுக்க வேண்டும். பகலில் முன்னோர்களுக்கு படைத்த பிறகு உணவு சாப்பிட வேண்டும். அதே போல் இரவு உணவாக பால், பழம் அல்லது மிக எளிமையான உணவு மட்டும் எடுத்துக் கொள்ள வேண்டும்.