6 மாதத்திற்கு கூட்டணி குறித்த கேள்விகளை கேட்க வேண்டாம் - தமிழிசை..!

முன்னாள் ஆளுநர் தமிழிசை சௌந்தரராஜன் மதுரை மீனாட்சி அம்மன் கோவிலில் சாமி தரிசனம் செய்தார்.

பின்னர் செய்தியாளர்களை சந்தித்த தமிழிசை சௌந்தர்ராஜன் கூறியதாவது, "தமிழகத்தில் தமிழ் மொழி பிரதான மொழியாக உள்ள நிலையில் அம்மொழியை மத்திய அரசு அழிக்க நினைப்பதாக ஒரு மாய தோற்றத்தை திமுக அரசு ஏற்படுத்தி வருகிறது.

பலமுறை ஆட்சியில் இருந்த திமுக தமிழை அடிப்படை கல்வியாக கொடுக்கவில்லை, தமிழகத்தில் தமிழ் மொழி தெரியாமலேயே ஒருவர் பட்டப்படிப்பை நிறைவு செய்யும் நிலை இருந்து வருகிறது.

பொறியியல், மருத்துவக் கல்வியை மாநில மொழிகளில் கொண்டு வரலாம் என கூறிய பிறகும் தமிழில் ஏன் மருத்துவம், பொறியியல் கல்வியை கொண்டு வரவில்லை. தமிழகத்தில் முன்னாள் முதலமைச்சர் எம்ஜிஆர் நிறுவிய தமிழ் பல்கலைக்கழகத்திற்கு பின்னர் ஏன் வேறெந்த தமிழ் பல்கலைக்கழகங்களும் கொண்டு வரப்படவில்லை. தமிழ் மொழியை கொண்டாடலாமே?.

மத்திய அரசு நிறுவனங்களில் இந்தி மொழி இருப்பதால் மூச்சு முட்டுகிறது என தமிழக முதலமைச்சர் கூறியுள்ளார். மத்திய அமைச்சரவையில் கூட்டணியில் உள்ள போது மூச்சு முட்ட வில்லையா?,

தமிழை வளர்க்கும் பணியில் பாஜக ஈடுபட்டு வருகிறது. தமிழக முதலமைச்சர் தமிழ் ஆங்கிலத்தை வளர்த்து வருகிறார. மத்திய அரசு இந்தியை திணிக்கவில்லை, மூன்றாவது மொழி கற்றுக் கொள்ளுங்கள் என்று தான் கூறுகிறோம்.

நாடாளுமன்ற தொகுதி மறுசீரமைப்பில் தமிழ்நாடு பாதிக்கப்படாது. திமுகவின் குற்றங்களை மறைப்பதற்கு மத்திய அரசுக்கு தினம் ஒரு கடிதம் எழுதி வருகிறார்.

அதிமுக எந்த ஒரு கட்சியின் கூட்டணிக்காக தவம் இருக்கவில்லை என எடப்பாடி பழனிசாமி கூறியதற்கு பதில் அளித்த தமிழிசை, "பாஜக - அதிமுக கூட்டணி குறித்து 6 மாதத்திற்கு எந்த ஒரு கேள்வியையும் கேட்க வேண்டாம்.

இன்னும் 6 மாதத்தில் கூட்டணி குறித்து பேச்சுவார்த்தை நடத்தி முடிவு செய்யப்படும். தம்பி விஜய், திமுக தமிழகத்தில் இருந்து அப்புறப்படுத்த வேண்டிய கட்சி என்று கூறியுள்ளார். பாஜக நிலைப்பாடும் அதுதான். தமிழகத்தில் பெண்கள் பாதுகாப்பாக இருக்க வேண்டும் என்றால் 2026 இல் திமுக அரசு நீக்கப்பட வேண்டும்.

தமிழகத்தில் தற்போது பாஜக கால் பதித்து வருகிறது. எதிர்வரும் 2026 சட்டமன்றத் தேர்தலில் யாருடன் சேர்ந்து கால் பதிக்கும் என்பது குறித்து மத்திய தலைமை முடிவு செய்யும்" இவ்வாறு தெரிவித்தார்.