இது தெரியுமா ? மெடிக்கல் ஷாப் ஓப்பன் பண்ணுங்க...அரசே உதவி பண்ணும்..!

பிரதான் மந்திரி ஜன் ஔஷதி கேந்திரா (மக்கள் மருந்தகம்) மெடிக்கல் ஸ்டோர்களைத் திறக்க மத்திய அரசு மக்களை ஊக்குவித்து வருகிறது. எனவே இந்த வாய்ப்பை நீங்கள் பயன்படுத்திக் கொள்ளலாம்.

இந்த மருந்துக் கடைகளில் பொதுவான மருந்துகளை விட மிகவும் மலிவான மருந்துகள் கிடைக்கும். ஆனால் அந்த மருந்துகளின் செயல்பாட்டில் எந்தக் குறையும் இருக்காது. அதனால்தான் இந்த மருந்து மையங்களை திறக்க மத்திய அரசு தொடர்ந்து ஊக்குவித்து வருகிறது. இந்த மருந்துக் கடைகளைத் திறக்க சில நிபந்தனைகளை பூர்த்தி செய்ய வேண்டும். இந்த கடைகளை அனைவரும் திறக்க முடியாது. டி பார்மா அல்லது பி பார்மா சான்றிதழ் உள்ளவர் மட்டுமே பிஎம் ஜன் ஔஷதி கேந்திராவைத் திறக்க முடியும்.

மருந்துக் கடை திறக்க 120 சதுர அடி இடம் இருக்க வேண்டும். இதைத் திறக்க ரூ.5000 கட்டணம் செலுத்த வேண்டும். பிரதமர் ஜன் ஔஷதி கேந்திரா எங்கு வேண்டுமானாலும் திறக்கப்படலாம். குறிப்பிட்ட இடம் என்று எதுவும் இல்லை. பிஎம் ஜன் ஔஷதி கேந்திராவைத் திறக்க விரும்பும் எந்தவொரு நபரும் மருந்து சான்றிதழுடன் சில ஆவணங்களையும் வைத்திருக்க வேண்டும். ஆதார் கார்டு, பான் கார்டு, முகவரிச் சான்று, மருந்தாளுனர் பதிவுச் சான்றிதழ் போன்றவை தேவைப்படும்.

ஜன் ஔஷதி கேந்திராவைத் திறக்க நீங்கள் எங்கும் செல்ல வேண்டியதில்லை. அதைத் திறக்க, வீட்டிலிருந்தே ஆன்லைனில் விண்ணப்பிக்கலாம். இதற்கு janaushadhi.gov.in என்ற அதிகாரப்பூர்வ இணையதளத்தில் விண்ணப்பிக்க வேண்டும். ஜன் ஔஷதி கேந்திராவைத் திறப்பதற்கு அரசால் நிதியுதவியும் வழங்கப்படுகிறது. சிறப்புப் பிரிவின் கீழ் வரும் (பெண்கள், ஊனமுற்றோர், எஸ்சி, எஸ்டி முதலியன) மக்களுக்கு மத்திய அரசால் ரூ.2 லட்சம் வழங்கப்படுகிறது. இந்த தொகையில் ரூ.1.50 லட்சம் பர்னிச்சர் மற்றும் இதர பொருட்களை திருப்பி செலுத்தவும், மீதி ரூ.50,000 கம்ப்யூட்டர், இன்டர்நெட், பிரிண்டர், ஸ்கேனர் போன்றவற்றுக்கு செலவாகும்.

இதன் கீழ், ஒவ்வொரு மாதமும் ரூ. 5 லட்சம் மதிப்புள்ள மருந்துகளை வாங்கினால் 15 சதவீதம் அல்லது அதிகபட்சமாக ரூ.15,000 ஊக்கத்தொகையாகப் பெறலாம். இந்த ஜன் ஔஷதி கேந்திராக்களில் இருந்து மருந்துகளின் விற்பனையில் 20 சதவீதம் வரை மார்ஜின் உள்ளது. ஒவ்வொரு மாதமும் செய்யப்படும் விற்பனைக்கு அரசாங்கம் தனித்தனியான சலுகைகளையும் வழங்குகிறது. ஒரு மாதத்தில் 5 லட்சம் ரூபாய்க்கு விற்றால், 20 சதவீத மார்ஜினில் இருந்து ஒரு லட்சம் ரூபாய் மற்றும் ஊக்கத் தொகையாக 15,000 ரூபாய் என மொத்தம் 1.15 லட்சம் ரூபாய் கிடைக்கும். இதன் மூலம் நீங்கள் கை நிறைய சம்பாதிக்கலாம்.