10ம் வகுப்பு கணித தேர்வு தேதியை மாற்ற அரசுக்கு வலுக்கும் கோரிக்கை..!

10, 11, 12 ஆம் வகுப்புகளுக்கான பொதுத்தேர்வு அட்டவணையைப் பள்ளிக் கல்வித்துறை அமைச்சர் அன்பில் மகேஷ் பொய்யாமொழி இன்று வெளியிட்டுள்ளார். அதன்படி,10 ஆம் வகுப்பிற்கு அடுத்த ஆண்டு பிப்ரவரி 23 முதல் 29 ஆம் தேதி வரை செய்முறை தேர்வு நடைபெற உள்ளது. 11 ஆம் வகுப்பிற்கு பிப்ரவரி 19 முதல் 24 ஆம் தேதி வரை செய்முறைத் தேர்வுகள் நடைபெற உள்ளது. 12 ஆம் வகுப்பிற்கு பிப்ரவரி 12 முதல் 17 ஆம் தேதி வரை செய்முறைத் தேர்வுகள் நடைபெற உள்ளது.

பொதுத் தேர்வு தேதிகள் : 10 ஆம் வகுப்பிற்கு அடுத்த ஆண்டு மார்ச் 26 தொடங்கி ஏப்ரல் 8 ஆம் தேதி வரை பொதுத் தேர்வுகள் நடைபெற உள்ளது. 11ம் மாணவர்களுக்கு மார்ச் 4 ஆம் தேதி தொடங்கி மார்ச் 25 ஆம் தேதி வரை நடைபெற உள்ளது.12ம் வகுப்பு பொதுத் தேர்வு மார்ச் 1 ஆம் தேதி தொடங்கி மார்ச் 22 ஆம் தேதி வரையிலும் நடைபெறும் என அறிவிக்கப்பட்டுள்ளது. 

இந்நிலையில், அடுத்தாண்டு ஏப்ரல் 1ம் தேதி நடைபெற உள்ள பத்தாம் வகுப்பு கணித தேர்வு தேதி மாற்ற வேண்டும் என தமிழ்நாடு பட்டதாரி ஆசிரியர் கூட்டமைப்பு அரசுக்கு கோரிக்கை விடுத்துள்ளனர். தேர்வுக்கு முன்பு புனித வெள்ளி மற்றும் ஈஸ்டர் பண்டிகை வர உள்ளதால் தேர்வு தேதியை மாற்றவும் என்றும் கோரிக்கை வைத்துள்ளனர்.