1977ம் ஆண்டுக்கு பின், கொங்கு மண்டலம் வழியாக புயல் சின்னம் பயணம் - கோவை வெதர்மன் எச்சரிக்கை..!!

மழை தொடர்பாக கோவை வெதர்மேன் சந்தோஷ் கிருஷ்ணன் செய்தியாளர்களுக்கு அளித்த பேட்டியில் கூறியதாவது: புயல் சின்னம் பாண்டிச்சேரியை கடந்து கோவைக்கு வருவது போல் உள்ளது. 1977ம் ஆண்டுக்கு பின்னர், கொங்கு மண்டலம் வழியாக புயல் சின்னம் பயணிக்கப் போகிறது. இதன் காரணமாகி கொங்கு பகுதிகளில் கனமழை வர வாய்ப்புள்ளது.

கோவை, திருப்பூர், நீலகிரி, நாமக்கல், ஈரோடு, சேலம், கரூர் ஆகிய மாவட்டங்களில் மிக கனமழை பெய்ய வாய்ப்புகள் உள்ளது. 15 செ.மீ - 25 செ.மீ வரை மழை பெய்ய வாய்ப்பு உள்ளது.

கொங்கு மண்டலத்தின் வழியாக பொதுவாக புயல்கள் பயணிக்காது. இது மிகவும் அரிதான நிகழ்வு. நீலகிரி மாவட்ட பகுதிகளில் அதீத கன மழை இருக்கும். அங்கு 30 முதல் 40 செ.மீ வரை மழை பெய்ய வாய்ப்பு உள்ளது. டிசம்பர் 1 முதல் 3ம் தேதி வரை நீலகிரி செல்வதை மக்கள் தவிர்க்க வேண்டும்

கோவை மாவட்டத்தில் தாழ்வான பகுதிகளில் வெள்ளம் வர வாய்ப்புகள் உள்ளது. ஆனால் சென்னை அளவிற்கு வெள்ளம் வர வாய்ப்பு இல்லை. வானிலை ஆய்வு மையம் இந்த பகுதிக்கு புயல் வர வாய்ப்பில்லை என கூறியிருப்பது குறித்தான கேள்விக்கு, வானிலை ஆய்வு மையம் கடலோரப் பகுதிகளுக்கு தான் முதல் எச்சரிக்கை விடுவார்கள். கடலோர மாவட்டங்களில் அதிக கன மழை இருக்கும் பட்சத்தில், கோவைக்கு வரும்பொழுது சற்று குறைந்து விடும். 30 முதல் 50 கிலோ மீட்டர் வேகத்தில் காற்று வீச வாய்ப்புகள் உள்ளது.

புவி வெப்பமயமாதல் ஆகியவை புயலின் வலுவை அதிகரிக்கிறது. தென்மேற்கு பருவமழை காலங்களில் மேக வெடிப்பு அதிகம் நடைபெறும். வடகிழக்கு பருவ மழை காலங்களில் புயலின் சலனங்கள் வைத்து மழைப்பொழிவு இருக்கும். தற்பொழுது உள்ள சூழலைப் பொறுத்தவரை காலையில் இருந்து தொடர் மழை இருக்கலாம். 48 மணி நேரத்தில் சுமார் 20 செ.மீ மழை பெய்யலாம் என கூறினார்.