#BREAKING : ரஷ்யாவின் முயற்சி தோல்வி..! நிலவில் "லூனா-25" விழுந்து நொறுங்கியது..!

இஸ்ரோ, சந்திரயான்-3 விண்கலத்தை நிலவின் தென் துருவத்தை ஆராய்ச்சி செய்வதற்காக கடந்த ஜூலை 14 ஆம் தேதி விண்ணில் செலுத்தியது. வரும் 23 ஆம் தேதி மாலை நிலவின் தென் துருவத்தில் மென்மையான முறையில் சந்திரயான்-3 தரையிறங்க உள்ளது.

இந்தியாவுக்கு போட்டியாக ரஷியாவும் நிலவை ஆய்வு செய்ய விண்கலத்தை செலுத்தி உள்ளது. கடந்த 1976-ம் ஆண்டு, லூனா-24 என்ற விண்கலத்தை ரஷியா செலுத்தியது. அதன்பிறகு, 47 ஆண்டுகள் கழித்து, மீண்டும் ஆய்வு செய்ய முனைந்துள்ளது.

கடந்த 10-ந்தேதி, லூனா-25 என்ற விண்கலத்தை விண்ணில் செலுத்தியது. சந்திரயானுக்கு முன்பாகவே, வருகிற 21-ந்தேதி நிலவின் தென்துருவத்தில் லூனாவை தரையிறக்க ரஷியா திட்டமிட்டுள்ளது. அதாவது, ஏவப்பட்ட 11 நாட்களில் தரையிறங்குகிறது.

இந்த நிலையில், லூனா-25 விண்கலம் நாளை நிலவில் தரையிறங்கிவதில் தற்போது சிக்கல் ஏற்பட்டுள்ளது. அதாவது, விண்கலம் நிலவில் தரையிறங்குவதற்கான இறுதி கட்ட சுற்றுப்பாதையை குறைப்பதில் திடீர் சிக்கல் ஏற்பட்டுள்ளது. இதன் காரணமாக, இறுதி சுற்றுவட்டப்பாதைக்கு அனுப்ப முடியாமல், தற்போதைய பாதையிலேயே லூனா-25 விண்கலம் சுற்றி வருகிறது. அவசர நிலைமையை ஆராய்ந்து வருவதாகவும், விண்கலத்தில் ஏற்பட்ட திடீர் கோளாறை விரைந்து சரி செய்யும் பணிகள் நடைபெற்று வருகிறது என்றும் ரஷிய விண்வெளி நிறுவனமான ராஸ்கோஸ்மோஸ் தெரிவித்தார்.

இந்நிலையில், ரஷ்யா அனுப்பிய லூனா-25 விண்கலம் விழுந்து நொறுங்கியதாக அதிர்ச்சி தகவல் வெளியாகியுள்ளது. ஆக.10ல் அனுப்பப்பட்ட ரஷ்யாவின் லூனா-25 விண்கலத்தில் திடீரென்று ஏற்பட்ட கோளாறால், நிலவில் தரையிறக்குவதில் சிக்கல் நிலவிய நிலையில், தற்போது விழுந்து நொறுங்கியுள்ளது. ரஷ்ய விண்கலம் விழுந்து நொறுங்கியதால் நிலவின் தென் துருவத்தில் விண்கலத்தை தரையிறக்கும் முதல் நாடு என்ற பெருமையை இந்தியா பெறுகிறது.