மக்களே டூர் போக ரெடியா ? இனி தாய்லாந்து செல்ல விசா தேவையில்லை..!

சுற்றுலா பயணிகள் வருகையை அதிகரிக்கும் வகையில் புதிய அறிவிப்பை வெளியிட்டது தாய்லாந்து அரசு. தாய்லாந்தில் 30 நாட்கள் வரை இந்தியர்கள் விசா இன்றி தங்கலாம் என்று தாய்லாந்து அரசு அறிவித்திருக்கிறது.

தாய்லாந்து அரசு சுற்றுலாவை மிகப் பிரதான வருவாயாக கொண்டு செயல்பட்டு வருகிறது. அதிலும் குறிப்பாக இந்தியர்கள் அதிக அளவில் தாய்லாந்து நாட்டிற்கு சுற்றுலாவிற்கு செல்வதால் தாய்லாந்தரசு இந்திய சுற்றுலாப் பணிகளுக்கு கூடுதல் முக்கியத்துவம் அளித்து வருகிறது. மேலும் இந்திய சுற்றுலா பயணிகளுக்கு விசா வழங்கும் நடைமுறையையும் மிக எளிதாக கையாண்டு வருவதும் குறிப்பிடத்தக்கது.

இந்த நிலையில் உள்நாட்டு பொருளாதாரத்தை மேம்படுத்தவும், அந்நிய செலாவணி கையிருப்பை விரிவு படுத்தவும் தாய்லாந்து அரசு சோதனை முயற்சியாக 2023 நவம்பர் மாதம் முதல் 2024 மே மாதம் வரை இந்தியாவில் இருந்து தாய்லாந்து வரும் பயணிகளுக்கு விசா தேவை இல்லை என்று தெரிவித்திருக்கிறது. மேலும் விசா இல்லாமல் தாய்லாந்து வரும் இந்திய பயணிகள் 30 நாட்கள் வரை தாய்லாந்தில் எந்த பகுதிக்கும் செல்ல தடை இல்லை என்றும் தெரிவிக்கப்பட்டுள்ளது.

சமீபத்தில் தங்கள் நாட்டுக்கு வரும் இந்தியர்களுக்கு விசா தேவையில்லை என இலங்கை அரசு அறிவித்திருந்தது. இந்த நிலையில், இலங்கையை தொடர்ந்து தாய்லாந்து அரசும், இந்திய சுற்றுலா பயணிகளுக்கு இந்த சலுகையை வழங்கி இருப்பது குறிப்பிடத்தக்கது.