ஆகஸ்ட் மாதம் திருப்பதி போற பிளானா? இந்த பதிவு உங்களுக்கு தான்..!

திருப்பதியில் தற்போது வரை ஆகஸ்ட் மாத இறுதி வரை சுவாமி தரிசனம் செய்வதற்கான அனைத்து டிக்கெட்களும் முன்பதிவு செய்யப்பட்டு விட்டன. ஆகஸ்ட் மாதத்தில் ஏழுமலையானை தரிசனம் செய்ய வேண்டும் என்றால் அதற்கு இரண்டு வழிகள் மட்டுமே உள்ளது. ஒன்று, ஸ்ரீனிவாச திவ்ய அனுகிரக ஹோமம். இதற்கான டிக்கெட்கள் ஜூலை மாதத்தில் வழங்கப்படும். அப்போது ஆன்லைன் அல்லது ஆஃப்லைனில் டிக்கெட் பெற்று சுவாமி தரிசனம் செய்யலாம். அப்படி இல்லை என்றால் எஸ்எஸ்டி டோக்கன் பெற்று மட்டும் ஆகஸ்ட் மாதத்தில் ஏழுமலையானை தரிசனம் செய்ய முடியும்.

செப்டம்பர் மாதம் திருப்பதியில் சுவாமி தரிசனம் செய்வதற்கான டிக்கெட்கள் வழக்கம் போல் ஜூன் மாதம் 18ம் தேதி லக்கி டிப் முன்பதிவுடன் துவங்க உள்ளது. செப்டம்பர் மாதத்தில் புரட்டாசி மாதமும் துவங்க உள்ளதால் வழக்கத்தை விட திருப்பதியில் பக்தர்கள் கூட்டம் அதிகமாகவே காணப்படும். அது மட்டுமின்றி புரட்டாசி மாத சனிக்கிழமைகளுடன் சேர்த்து, புரட்டாசியில் நடைபெறும் பிரம்மோற்சவ விழாவை காணவும் பக்தர்கள் அதிகமாக வருவார்கள். அதனால் புரட்டாசி சனிக்கிழமைகள் மற்றும் பிரம்மோற்சவம் நடைபெறும் தேதிகளை தெரிந்து கொண்டு அதற்கு ஏற்றாற் போல் டிக்கெட் முன்பதிவு செய்தால் சிரமம் இல்லாமல் ஏழுமலையானை தரிசனம் செய்து விட்டு வர முடியும்.

இந்த ஆண்டு புரட்டாசி மாதம் செப்டம்பர் 17ம் தேதி துவங்கி, அக்டோபர் 17ம் தேதி வரை உள்ளது. இதில் செப்டம்பர் 20, 27, அக்டோபர் 4, 11 ஆகிய தேதிகளில் புரட்டாசி சனிக்கிழமை வருகிறது. செப்டம்பர் 24ம் தேதி துவங்கி, அக்டோபர் 02ம் தேதி வரை திருப்பதியில் புரட்டாசி பிரம்மோற்சவ விழா நடைபெற உள்ளது. இதனால் இந்த 10 நாட்களும் சில சிறப்பு தரிசனங்கள் ரத்து செய்யப்படவும் வாய்ப்புள்ளது. அதனால் ரத்து செய்யப்படும் தரிசனங்கள் தவிர்த்து மற்ற தரிசனங்களுக்கு மட்டுமே டிக்கெட்கள் வெளியிடப்படும். அதே சமயம் ரூ.300 சிறப்பு தரிசன டிக்கெட்கள் அனைத்து நாட்களுமே வழங்கப்படும்.

செப்டம்பர் மாதத்தில் செப்டம்பர் 20 ம் தேதி புரட்டாசி முதல் சனிக்கிழமை வருகிறது. இந்த நாளில் வழக்கம் போல் ஆன்லைனில் டிக்கெட் முன்பதிவு செய்து தரிசனம் பார்க்க முடியும். ஆனால் புரட்டாசி 2வது சனிக்கிழமையான செப்டம்பர் 27ம் தேதி பிரம்மோற்சவம் நடைபெறும் என்பதால் அன்றைய நாளில் சில தரிசனங்கள் இருக்காது. அதாவது புரட்டாசி 2வது மற்றும் 3வது சனிக்கிழமையில் சில குறிப்பிட்ட தரிசனங்கள் இருக்காது என்பதால் அந்த தேதிகளில் தரிசன டிக்கெட் முன்பதிவு செய்பவர்கள் கொஞ்சம் கவனித்து புக் செய்ய வேண்டும்.