சென்னை நகரில் இயங்கும் ஆயிரக்கணக்கான பேருந்துகளில் நாள்தோறும் பல லட்சக்கணக்கான பொதுமக்கள் பயணம் செய்து வருகின்றனர். சென்னை மாநகரப் போக்குவரத்துக் கழகம் சார்பில் அலுவலகங்கள், கல்லூரிகளுக்கு செல்லும் அன்றாட பயணிகள் பயன்பெறும் வகையில் பல்வேறு பயண சலுகை திட்டங்கள் நடைமுறையில் உள்ளன. குறிப்பிட்ட ஒரு இடத்தில் இருந்து மற்றொரு இடத்துக்கு சாதாரண பேருந்தில் நாள்தோறும் பயணிப்பதற்கான பயண சலுகை அட்டை குறைந்த விலையில் அளிக்கப்பட்டு வருகிறது.

இந்நிலையில் அரசு போக்குவரத்துக்கழகம் சார்பில் ரூ.2 ஆயிரத்திற்கு மாதாந்திர சலுகைப் பயணச்சீட்டை அமைச்சர் சிவசங்கர் அறிமுகம் செய்து வைத்தார். ரூ.2,000 கட்டணத்தில் ஏ.சி. பேருந்துகள் உட்பட அனைத்து பேருந்துகளிலும் மாதம் முழுவதும் விருப்பம் போல் பயணம் செய்யலாம். ஏற்கனவே மாதம் ரூ.1,000 சலுகை அட்டை பயணத்தில் ஏ.சி. பேருந்துகள் தவிர ஏனைய பேருந்துகளில் பயணிக்க வழிவகை உள்ளது என்பது குறிப்பிடத்தக்கது.

விருப்பம்போல் பயணம் செய்யும் (TAYPT) மாதாந்திர பயண அட்டை கட்டணமாக ரூ.2000/- நிர்ணயிக்கப்பட்டுள்ளது. சென்னை, மாநகர் போக்குவரத்துக் கழகத்தில், குளிர்சாதன பேருந்து உட்பட அனைத்து பேருந்துகளிலும் விருப்பம்போல் பயணம் செய்யலாம்.  

அதேபோல், ஏற்கனவே நடைமுறையில் உள்ள, ரூ.1000 மதிப்பிலான விருப்பம்போல் பயணம் செய்யும் மாதாந்திர சலுகைப் பயண (குளிர்சாதன பேருந்து நீங்களாக) அட்டையையும் பயணிகள் பெற்றுக் கொள்ளலாம்.

ஆயிரம் ரூபாய் பாஸ் எடுத்தால் ஏசி பேருந்துகளில் பயணிக்க முடியாது. இப்போது அறிமுகம் செய்யப்பட்டிருக்கும் பாஸை எடுத்தால் ஏசி பேருந்துகளிலும் பயணிக்கலாம். சென்னை வாசிகளின் பேருந்து கால நேர மிச்சமாகும். இல்லையென்றால் ஏசி பேருந்து வரும்போது ஏற முடியாமல், மற்ற பேருந்துகள் வரும் வரை காத்திருக்க வேண்டும்.

MTC மாதாந்திர சலுகைப் பயணச்சீட்டு விற்பனை மையங்கள் : அடையாறு, அம்பத்தூர் தொழிற்பேட்டை, பல்லாவரம், பெரம்பூர், அம்பத்தூர் ஓ.டி., பூந்தமல்லி, அண்ணா நகர் (மேற்கு), செங்குன்றம், சைதாப்பேட்டை, ஆவடி, அயனாவரம், பிராட்வே, கோயம்பேடு, 'சென்ட்ரல் ரயில் நிலையம், கிண்டி தொழிற்பேட்டை, ஐயப்பன்தாங்கல், கிளாம்பாக்கம், ஸ்ரீபெரும்புதூர், தி. நகர், தாம்பரம் (மேற்கு), திருவான்மியூர், திருவொற்றியூர், கே.கே. நகர், எம்.கே.பி. நகர், மந்தவெளி, தண்டையார்பேட்டை, வடபழனி வள்ளலார் நகர் (மின்ட்), வேளச்சேரி, ஐ.சி.எப்.