பற்றி எரியும் மணிப்பூர்... மீண்டும் ஊரடங்கு அமல்..!

மணிப்பூரில் பல்கலைக் கழக மாணவர்கள் தொடர்ச்சியாக போராட்டங்களில் ஈடுபட்டு வருகின்றனர். நேற்றைய தினம் ஆளுநர் மாளிகையை முற்றுகையிட்டு போராட்டம் நடத்தினர். மணிப்பூர் தலைமை செயலகமும் முற்றுகையிடப்பட்டது. சமீபத்திய ட்ரோன் மற்றும் ஏவுகணைத் தாக்குதல்களுக்குப் பின்னணியில் உள்ளவர்கள் மீது நடவடிக்கை எடுக்க மாணவர்கள் வலியுறுத்தினர். மேலும், மாநிலத்தின் ஒருமைப்பாட்டை பாதுகாக்க அழைப்பு விடுத்தனர்.

தவுபால் மாவட்டத்தில் போராட்டம் நடத்திய மாணவர்கள் மீது காவல் துறையினர் துப்பாக்கிச் சூடு நடத்தினர். இதில், ஒரு மாணவரின் தொடையில் குண்டு துளைத்தது. இதை அடுத்து, தவுபாலில் 144 தடை உத்தரவு பிறப்பிக்கப்பட்டுள்ளது. ஐந்து அல்லது அதற்கு மேற்பட்ட நபர்கள் கூடுவதை தடுக்கும் நோக்கில் இந்த உத்தரவு பிறப்பிக்கப்பட்டுள்ளது.

இந்நிலையில் மாணவர் போராட்டத்தில் வன்முறை வெடித்த நிலையில் இன்று மூன்று இடங்களில் பாதுகாப்பு படை வீரர்கள் தடியடி நடத்தினர். கண்ணீர் புகை குண்டுகள் வீசப்பட்டன.

மணிப்பூர் கலவரத்தை தடுக்க தவறிய முதலமைச்சர் பிரேண் சிங் இல்லம் மாணவர் சங்கத்தினரால் முற்றுகையிடப்பட்டது. மணிப்பூர் ஆளுநர் இல்லமும் முற்றுகையிடப்பட்டது.

இம்பால் கிழக்கு மாவட்ட ஆட்சியர் இன்று (செப்டம்பர் 10) காலை பிறப்பித்த உத்தரவில், "மாவட்டத்தின் சட்டம் மற்றும் ஒழுங்கு பராமரிப்பில் அதிகரித்து வரும் சவால்களைக் கருத்தில் கொண்டு, ஊரடங்கு உத்தரவு தளர்வுக்கான முந்தைய உத்தரவுகள் செப்டம்பர் 10 ஆம் தேதி காலை 11 மணி முதல் உடனடியாக ரத்து செய்யப்படுகின்றன. இம்பால் கிழக்கு மாவட்டத்தில் முழுமையான ஊரடங்கு உத்தரவு அமல்படுத்தப்படுகிறது. அடுத்த உத்தரவு வரும் வரை இது உடனடியாக அமலுக்கு வரும்" என தெரிவிக்கப்பட்டுள்ளது.

இம்பால் மேற்கு மாவட்ட ஆட்சியர் பிறப்பித்த உத்தரவில், "ஊரடங்கு உத்தரவு தளர்வுக்கான முந்தைய அனைத்து உத்தரவுகளும் இன்று (செப்டம்பர் 10) காலை 11 மணி முதல் முடிவுக்கு வருகின்றன. கடந்த ஆண்டு செப்டம்பர் 1 முதல் மக்கள் அந்தந்த குடியிருப்புகளுக்கு வெளியே நடமாடுவதற்கான கட்டுப்பாடு நீக்கப்பட்டது" என்று தெரிவிக்கப்பட்டுள்ளது.

தொடர்ந்து மணிப்பூர் மாநிலம் தலைநகர் இம்பாலில் நிலைமை மோசமடைந்து வருவதால் இம்பாலில் ஊரடங்கு உத்தரவு பிறப்பிக்கப்பட்டுள்ளது. பொது மக்கள் யாரும் வெளியே வரக் கூடாது என அறிவுறுத்தப்பட்டுள்ளது. நான்கு பேருக்கு மேல் சேர்ந்து சாலைகளில் நடக்க கூடாது. ஆயுதங்களோடு சாலைகளில் நடக்க கூடாது.

மணிப்பூரிலும் ஊரடங்கிற்கான கால அளவு நீட்டிக்கப்பட்டுள்ளது. மணிப்பூரில் செப்டம்பர் 15ஆம் தேதி வரை இணையதளம் முடக்கம் செய்யப்பட்டுள்ளது.