2025ஆம் ஆண்டு 72 நாள்கள் பொது விடுமுறை... தீபாவளிக்கு 4 நாள்கள் விடுமுறையா?

 சுதந்திர தினம், குடியரசு தினம், மே தினம், காந்தி ஜெயந்தி போன்ற தேசிய அளவில் முக்கியத்துவம் வாய்ந்த நிகழ்வுகள், வருட பிறப்புகள் ஆகியவற்றிற்காக 23 நாள்களை பொது விடுமுறை நாள்களாக அறிவித்துள்ளது. இந்த 23 நாள்களில் 3 நாள்கள் ஞாயிற்றுக் கிழமை வருவதால் அதை தவிர்த்துவிட்டு பார்த்தால் 20 நாள்கள் வருகின்றன. எனவே 52 ஞாயிற்று கிழமை + 20 பொது விடுமுறை நாள்கள் என மொத்தம் 2025ஆம் ஆண்டு 72 நாள்கள் பொது விடுமுறை நாள்களாக உள்ளன.
 

ஞாயிற்று கிழமைகளை தவிர்த்து அரசு அறிவித்துள்ள 23 நாள்களை பார்த்தால் அதிக பொது விடுமுறை உள்ள மாதமாக ஜனவரி மாதமே உள்ளது. ஜனவரி மாதத்தில் மட்டும் ஆங்கிலப் புத்தாண்டு, பொங்கல் பண்டிகை , திருவள்ளுவர் தினம் , உழவர் திருநாள், குடியரசு தினம் என ஐந்து நாள்கள் விடுமுறை வருகின்றன. நவம்பர் மாதத்தில் ஒரு நாள் கூட அரசு பொது விடுமுறை இல்லை.

மார்ச் 30ஆம் தேதி தெலுங்கு வருடப் பிறப்பு, மார்ச் 31 ரம்ஜான், ஏப்ரல் 1 வங்கிகள் ஆண்டு கணக்கு முடிவு என முன்று நாள்கள் தொடர் விடுமுறை உள்ளது. ஆனால் மார்ச் 30 ஞாயிற்றுக் கிழமையாக உள்ளது. ஏப்ரல் 1 என்பது வணிக/கூட்டுறவு நிறுவனங்களுக்கு மட்டும் தான் விடுமுறை என்பதால் பள்ளி, கல்லூரி, அரசு ஊழியர்களுக்கு வேலைநாளாகவே இருக்கும். எப்படியாகினும் சனி, ஞாயிறு, திங்கள் என மூன்று நாள்கள் தொடர் விடுமுறை உறுதி.
சுதந்திர தின விழாவும், (ஆகஸ்ட் 15 ) கிருஷ்ண ஜெயந்தியும் (ஆகஸ்ட் 16) அடுத்தடுத்த நாள்களில் வருகின்றன. அதோடு அவை வெள்ளி, சனி நாள்களில் வருவதால் ஞாயிற்றுக் கிழமையும் சேர்த்தால் மூன்று நாள்கள் தொடர் விடுமுறை கிடைக்கும்.

காலாண்டு தேர்வு செப்டம்பர் மாதம் நடைபெறும். செப்டம்பர் இறுதியில் காலாண்டு விடுமுறை தொடங்கி அக்டோபர் 2 காந்தி ஜெயந்தி விடுமுறைக்கு பின்னர் பள்ளிகள் மீண்டும் திறக்கப்படும். வழக்கமாக ஒரு வார காலம் காலாண்டு விடுமுறை விடப்படும். அதன் பின்னர் அக்டோபர் மத்தியில் விஜயதசமி, ஆயுத பூஜை விடுமுறை வரும் என்பதால் மாணவர்களுக்கு எப்போதும் அக்டோபர் மாதம் பிடித்தமானதாக இருக்கும்.

2025ஆம் ஆண்டு ஆயுத பூஜை, விஜயதசமி பண்டிகைகள் காலாண்டு விடுமுறை நாள்களில் வர உள்ளன. அதாவது அக்டோபர் 1 ஆயுத பூஜையும், அக்டோபர் 2 காந்தி ஜெயந்தியோடு விஜயதசமியும் ஒரே நாளில் வர உள்ளது. எனவே இது பள்ளி மாணவர்களிடையே அதிருப்தியை ஏற்படுத்தியுள்ளது. அதேசமயம் தீபாவளி பண்டிகை அக்டோபர் 20ஆம் தேதி திங்கள் கிழமை கொண்டாடப்பட உள்ளது. எனவே சனி, ஞாயிறுடன் சேர்த்து மூன்று நாள்கள் விடுமுறை கிடைக்கும். அரசு மனது வைத்தால் அதற்கு அடுத்த நாளும் விடுமுறை இருக்கலாம், ஆனால் இது அந்த சமயத்தில் அரசுக்கு வரும் கோரிக்கைகளை வைத்து முடிவெடுக்கப்படும்.