தமிழ்நாடு காவல் அதிகாரிகள் 23 பேருக்கு ஜனாதிபதி விருது..!

தமிழகத்தைச் சேர்ந்த 23 காவல் அதிகாரிகளுக்கு ஜனாதிபதி விருது அறிவிக்கப்பட்டுள்ளது. 15 தமிழக காவல்துறை அதிகாரிகளுக்கு சிறப்பு பதக்கங்களை  தமிழக அரசு அறிவித்துள்ளது. 

ஒவ்வோர் ஆண்டும் சுதந்திர தினத்தின்போது காவல் துறையில் மிகச்சிறப்பாக பணியாற்றியவர்களுக்கு ஜனாதிபதி விருது அறிவிக்கப்படும். 3 பிரிவுகளில் இந்த விருதுகள் அறிவிக்கப்படும். இந்த ஆண்டுக்கான விருதை மத்திய உள்துறை அமைச்சகம் வெளியிட்டுள்ளது. 

இதில் இந்த முறை வீர, தீர செயலுக்கான விருது பட்டியலில் தமிழகத்தைச் சேர்ந்த யாரும் இடம்பெறவில்லை. இந்த முறை வீர, தீர செயலுக்கான விருதை தெலுங்கானாவை சேர்ந்த காவலர் ஒருவர் பெறுகிறார். எனினும், மற்ற இரண்டு பிரிவுகளில் தமிழகத்தை சேர்ந்த காவல் அதிகாரிகள் விருதுகள் பெறுகின்றனர். வன்னியபெருமாள், அபின் தினேஷ் மோதக் ஆகிய இருவருக்கு சிறப்புமிக்க சேவைக்கான ஜனாதிபதி விருது அறிவிக்கப்பட்டுள்ளது.

திறம்பட சேவையாற்றிய பிரிவில் தமிழகத்தைச் சேர்ந்த 21 காவல் அதிகாரிகளுக்கு சிறப்பு விருதுகள் அறிவிக்கப்பட்டுள்ளன. அதன்படி, ஐ.ஜி. கண்ணன், ஐ.ஜி. பாபு, ஆணையர் பிரவீன்குமார், எஸ்.பி.க்கள் பெரோஸ்கான் அப்துல்லா, சுரேஷ்குமார், கிங்ஸ்லின், ஷியாம்ளா தேவி, பிரபாகர், பாலாஜி சரவணன் ஆகியோருக்கு விருதுகள் அறிவிக்கப்பட்டுள்ளது.

டி.எஸ்.பிக்கள் டில்லி பாபு, மனோகரன், சங்கு ஆகியோருக்கு விருதுகள் அறிவிக்கப்பட்டுள்ளது. இதே போல் ஏ.எஸ்.பி.க்கள் ராதாகிருஷ்ணன், ஸ்டீபன் ஆகியோருக்கு விருதுகள் அறிவிக்கப்பட்டுள்ளது. ஆய்வாளர்களில், தமிழகத்தைச் சேர்ந்த சந்திரசேகர், சந்திரமோகன், ஹரிபாபு, தமிழ்ச்செல்வி ஆகியோருக்கும் அறிவிக்கப்பட்டுள்ளது.

இதே போல், தமிழகத்தைச் சேர்ந்த 3 எஸ்.ஐ.க்களுக்கும் ஜனாதிபதியின் சிறப்பு விருதுகள் அறிவிக்கப்பட்டுள்ளன. வழக்கமாக இதே போல தீயணைப்பு துறையில் சிறப்பாக பணியாற்றியவர்களும் 3 பிரிவில் விருதுகள் அறிவிக்கப்படும். ஆனால், இந்த ஆண்டும் இந்தப் பட்டியலில் தமிழகத்தைச் சேர்ந்த யாரும் இடம்பெறவில்லை குறிப்பிடத்தக்கது.

இதே போல் மத்திய உள்துறைக்கான சிறப்பு விருது தமிழகத்தைச் சேர்ந்த 3 பேருக்கு அறிவிக்கப்பட்டுள்ளது. அதன்படி, கம்பெனி கமாண்டர் மூர்த்தி, பிளாட்டூர் கமாண்டர் கலையழகன், ஏரியா கமாண்டர் பிளாட்பினுக்கு உள்துறை விருதுகள் வழங்கப்படவுள்ளது.

இதற்கிடையே 15 காவல்துறை அதிகாரிகளுக்கு சிறப்பு பதக்கங்களை  தமிழக அரசு அறிவித்துள்ளது. இதுகுறித்து தமிழக அரசு வெளியிட்டுள்ள செய்திக்குறிப்பில் கூறியிருப்பதாவது:-

புலன் விசாரணைப் பணியில் மிகச்சிறப்பாகப் பணியாற்றியதை அங்கீகரிக்கும் வகையிலும், பணியில் ஈடுபாடு மற்றும் அர்ப்பணிப்புடன் பணிபுரிந்ததை பாராட்டும் வகையிலும் கீழ்கண்ட 10 காவல்துறை அதிகாரிகள் 2024-ம் ஆண்டு சுதந்திர தினத்தை முன்னிட்டு தமிழக முதல்-அமைச்சரின் காவல் புலன் விசாரணைக்கான சிறப்பு பணிப் பதக்கங்கள் வழங்கப்பட தேர்ந்தெடுக்கப்பட்டுள்ளார்கள்.

காவல்துறை அதிகாரிகள் விவரம் வருமாறு.,  கி.புனிதா, காவல் ஆய்வாளர், சைபர் கிரைம் காவல் நிலையம், வேலூர் மாவட்டம்,  து. வினோத்குமார், காவல் ஆய்வாளர், சைபர் கிரைம் பிரிவு, மத்திய குற்றப்பிரிவு, சென்னை.,  ச.செளமியா, காவல் துணை கண்காணிப்பாளர், மதுவிலக்கு அமலாக்கப் பிரிவு, கடலூர் மாவட்டம்.,  ஐ.சொர்ணவள்ளி, காவல்ஆய்வாளர், சைபர் கிரைம் காவல் நிலையம், திருப்பூர் மாநகரம்.,  நா. பார்வதி, காவல் ஆய்வாளர், குற்றப்பிரிவு குற்றப்புலனாய்வுத் துறை, நாகர்கோவில், கன்னியாகுமரி மாவட்டம்.,  பெ.ராதா, காவல் ஆய்வாளர், குற்றப்பிரிவு குற்றப்புலனாய்வுத் துறை, திருப்பூர்., செ.புகழேந்தி கணேஷ், காவல் துணை கண்காணிப்பாளர், செங்கல்பட்டு உட்கோட்டம், செங்கல்பட்டு மாவட்டம்., இரா.தெய்வராணி, காவல் ஆய்வாளர், பெருந்துறை காவல் வட்டம், ஈரோடு மாவட்டம்.,  ஆ. அன்பரசி, காவல் ஆய்வாளர், பொன்னை காவல் நிலையம், வேலுார் மாவட்டம். நா.சுரேஷ், துணை காவல் கண்காணிப்பாளர், ஊரக உட்கோட்டம், தூத்துக்குடி மாவட்டம். 

இதேபோன்று பொது மக்களின் சேவையில் தன்னலம் கருதாமல் சிறப்பாக செயல்பட்டு சீரிய பணியாற்றிய கீழ்கண்ட 5 காவல்துறை அதிகாரிகளுக்கு 2024-ம் ஆண்டு சுதந்திர தினத்தை முன்னிட்டு அவர்களது பணியைப் பாராட்டி சிறந்த பொதுச் சேவைக்கான தமிழக முதல்-அமைச்சரின் காவல் பதக்கம் வழங்கப்படும்:- தா.ச. அன்பு. இ.கா.ப., காவல் துறை தலைவர், குற்றப்பிரிவு குற்றப்புலனாய்வுதுறை, சென்னை.,  இ.கார்த்திக், இ.க.பா., காவல் கண்காணிப்பாளர்-1,தனிப்பிரிவு குற்றப்புலனாய்வு துறை, சென்னை.,  சி.ர.பூபதிராஜன், துணைக் காவல் கண்காணிப்பாளர், தனிப்பிரிவு குற்றப்பபுலனாய்வுத் துறை, சேலம் சரகம்., க.சீனிவாசன், காவல் ஆய்வாளர் (தொ.நு.), காவல் தொலைத்தொடர்பு பிரிவு, சென்னை., பு.வ. முபைதுல்லாஹ், காவல் உதவி ஆய்வாளர், உள்வட்ட பாதுகாப்பு பிரிவு, அயல்பணி திட்டமிட்ட குற்றங்கள் நுண்ணறிவு பிரிவு, தலைமையகம், சென்னை. 

விருதுகள் பெறுவோர் ஒவ்வொருவருக்கும் தலா 8 கிராம் எடையுடன் கூடிய தங்கப்பதக்கமும், 25 ஆயிரம் ரூபாய் ரொக்கப் பரிசும் வழங்கப்படும். மேற்கண்ட விருதுகள் தமிழ்நாடு முதல்-அமைச்சர் மு.க.ஸ்டாலினால் பிறிதொரு விழாவில் வழங்கப்படும். இவ்வாறு அதில் கூறப்பட்டுள்ளது.