ஆகஸ்ட் 1ஆம் தேதி முதல் வேலைநிறுத்த போராட்டம் நடத்துவதாக கர்நாடக மாநிலத்தில் செயல்பட்டு வரும் 108 அவசர ஆம்புலன்ஸ் சேவையில் பணியாற்றும் ஊழியர்கள் எச்சரிக்கை விடுத்துள்ளனர். 

108 ஆம்புலன்ஸ் சேவையில் சுமார் 3,500-க்கும் மேற்பட்ட ஊழியர்கள் பணியாற்றி வருகிறார்கள். இவர்கள் பெரும்பாலோர் ஒப்பந்த அடிப்படையில் நீண்ட காலமாக பணிபுரிந்து வருகின்றனர். ஆனால் இத்தனை ஆண்டுகளாகவும் நிரந்தர ஊழியர்களாக மாற்றப்படவில்லை என்பது முக்கிய புகாராக உள்ளது. வேலை பாதுகாப்பும், சம்பள உயர்வும் இல்லாத நிலை தொடர்ந்து அவர்கள் மனவருத்தத்திற்கு காரணமாகியுள்ளது.

அதேபோல், நாளுக்கு நாள் பணிச்சுமை அதிகரித்தாலும், அதற்கேற்ப ஊதியத்தில் திருத்தம் செய்யப்படவில்லை என்று ஊழியர்கள் குற்றம்சாட்டுகின்றனர். வேலை நேரத்திற்கு அதிகமாக பணிபுரிய வேண்டிய நிலை ஏற்படுகிறது; ஆனால், அதற்குரிய கூடுதல் ஊதியம் வழங்கப்படவில்லை என்றும் தெரிவிக்கின்றனர்.

இந்தப் பிரச்சினைகளைப் பற்றி ஏற்கனவே அரசு மற்றும் சுகாதாரத் துறை அதிகாரிகளை பலமுறை சந்தித்து மனு கொடுத்தும், இதுவரை எந்தத் தீர்வும் கிடைக்கவில்லை என்று வேலைநிறுத்தத்தை அறிவித்துள்ள தொழிற்சங்கங்கள் தெரிவித்துள்ளன. அரசு முறையாக பேச்சுவார்த்தையில் ஈடுபடாமல், அலட்சியமாக நடந்துகொள்வது தான் இந்த வேலைநிறுத்த முடிவை எடுக்கவைத்ததென அவர்கள் கூறுகின்றனர்.

நாங்கள் எப்போதும் மக்களுக்காக பணியாற்றுகிறோம். கஷ்ட நேரங்களில், புயல், வெள்ளம், கோடை வெப்பம் என எந்தவொரு சூழ்நிலையிலும் நாங்கள் சேவையிலேயே இருக்கிறோம். ஆனால் எங்களது நலன்களை அரசு புறக்கணிக்கிறது. இது சரியில்லை" என தொழிற்சங்கத்தினர் வருத்தம் தெரிவித்துள்ளனர்.வேலைநிறுத்தம் நடைபெற்றால், அவசர காலங்களில் மருத்துவ சேவையை நாடும் ஆயிரக்கணக்கான பொதுமக்களுக்கு கடும் பாதிப்பு ஏற்பட வாய்ப்புள்ளது. இதனால், மக்கள் நலனை கருத்தில் கொண்டு அரசே முன்னெடுத்து பேச்சுவார்த்தை நடத்தி, ஊழியர்களின் கோரிக்கைகளுக்கு தீர்வுகாண வேண்டும் என்ற அழுத்தம் எழுந்துள்ளது.

கர்நாடக மாநிலத்தில் ஏற்கனவே சுகாதார வசதிகள் கிராமப்புறங்களில் மிகவும் குறைவாக உள்ளன. இதுபோன்ற வேலைநிறுத்தங்கள் மேலும் சிக்கல்களை ஏற்படுத்தக்கூடும் என நிபுணர்கள் எச்சரிக்கின்றனர்.