பிரதமர் மோடியின் தாயார் ஹீரா பென் மோடி, உடல் நலக்குறைவால் மருத்துவமனையில் அனுமதிக்கப்பட்டிருந்த நிலையில் இன்று காலை காலமானார். அவருக்கு வயது 100.

அகமதாபாத்தில் உள்ள யு.என் மேத்தா மருத்துவமனையில் அனுமதிக்கப்பட்டிருந்த ஹீரா பென் மோடி சிகிச்சை பலனின்றி காலமானார். இந்த தகவலை நரேந்திரமோடி தனது ட்விட்டர் பக்கத்தில் உறுதி செய்துள்ளார்.

ஒரு புகழ்பெற்ற நூற்றாண்டு கடவுளின் காலடியை சேர்ந்துள்ளது, என பிரதமர் மோடி உருக்கமாக பதிவிட்டுள்ளார். இதைத்தொடர்ந்து மோடியின் தாயார் மறைவுக்கு அரசியல் தலைவர்கள் உள்ளிட பிரபலங்கள் இரங்கல் தெரிவித்து வருகின்றனர்.

தாயார் மறைவையடுத்து பிரதமர் மோடி அவசர அவசரமாக அகமதாபாத் புறப்பட்டு சென்றார். ஏற்கனவே திட்டமிட்டு இருந்த நிகழ்ச்சிகளில் காணொலி வாயிலாக பிரதமர் மோடி பங்கேற்பார் என்று மத்திய அரசு வட்டாரங்கள் கூறுகின்றன.

பிரதமரின் தாயின் உடலுக்கு அனைவரும் இறுதி அஞ்சலி செலுத்திய பிறகு உடல் மயானத்திற்கு கொண்டு செல்லப்பட்டது. உடலை பிரதமர் மோடி சுமந்து சென்றார்.

அதனைத் தொடர்ந்து பிரதமரின் தாயார் ஹீரா பென் உடல் இறுதிச் சடங்கிற்கு பிறகு தகனம் செய்யப்பட்டது.

newstm.in