நடித்துக் காட்டுவதற்காக தூக்கு மாட்டிய சிறுவன் உயிரிழப்பு!!

சென்னை மாதவரம் அடுத்த புழல் பகுதியில் நடித்துக் காட்டுவதற்காக தூக்கு மாட்டிய 11 வயது சிறுவன் எதிர்பாராத விதமாக உயிரிழந்த சம்பவம் அதிர்ச்சியை ஏற்படுத்தியுள்ளது.

புத்தகரம் காமராஜர் நகரை சேர்ந்த சீனிவாசன் என்பவரின் இளைய மகன் கார்த்திக் (11) அதே பகுதியில் உள்ள அரசு மேல்நிலைப் பள்ளியில் ஏழாம் வகுப்பு படித்து வந்தார். கார்த்திக் மற்றும் அவரது அண்ணன் ஆகிய இருவரும் தூக்கு போடுவது எப்படி என்பதை நடித்து காட்டியுள்ளனர்.

ஆனால் எதிர்பாராத விதமாக நடிப்பு நிஜமாகி கார்த்திக் தூக்கில் தொங்கி உயிரிழந்தார். வீட்டின் வெளியே நின்று கொண்டிருந்த அண்ணன் தன் வீட்டின் அருகே வேலை செய்திருந்தவரை அழைத்து நடந்ததை கூறியுள்ளார். இதன்பின்னர் அக்கம் பக்கத்தினர் காவல் துறைக்கு தகவல் கொடுத்தனர்.

தகவலின் பேரில் விரைந்து வந்த புழல் காவல்துறையினர் சடலத்தை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இதற்கிடையே தகவல் அறிந்து விரைந்து வந்த கார்த்தியின் தாய் கதறி அழுவது பார்ப்போர் கண்களை கலங்க வைத்தது.

இந்த சம்பவம் தொடர்பாக வழக்கு பதிவு செய்து விசாரணை போலீசார் விசாரணை மேற்கொண்டு வருகின்றனர்.

newstm.in