வெற்றிமாறன் படத்தில் தனுஷ், ஜூனியர் என்.டி.ஆர்!!

இயக்குநர் வெற்றிமாறன் படத்தில் நடிகர் தனுஷூம், தெலுங்கு நடிகர் ஜூனியர் என்டிஆரும் இணைந்து நடிக்க இருப்பதாக தகவல் வெளியாகியுள்ளது.

இயக்குநர் வெற்றிமாறன் சூரி, விஜய்சேதுபதியை வைத்து விடுதலை என்ற படத்தை இயக்கியுள்ளார். எழுத்தாளர் ஜெயமோகனின் சிறுகதையை அடிப்படையாகக் கொண்டு இந்தப் படம் தயாராகியுள்ளது.

இரண்டு பாகங்களாக உருவாகியுள்ள இந்தப் படத்தின் முதல் பாகம் வரும் 30 ஆம் தேதி வெளியாகும் என்று கூறப்படுகிறது. இளையராஜா இசையில் உன்னோடு நடந்தா என்ற பாடல் ஏற்கனவே வெளியாகி வரவேற்பை பெற்றுள்ளது.

இந்நிலையில் படத்தின் இசை வெளியீட்டு விழா இன்று நடைபெற உள்ளது. இந்த நிகழ்ச்சியில் தனுஷ் சிறப்பு விருந்தினராக கலந்துகொள்ளவிருப்பதாக தகவல் வெளியாகியுள்ளது. விடுதலை படத்துக்கு பிறகு சூர்யா நடிப்பில் வாடிவாசல் படத்தை வெற்றிமாறன் இயக்கவிருக்கிறார்.

தாணு தயாரிக்கவுள்ள இந்தப் படத்துக்கு ஜி.வி.பிரகாஷ் இசையமைக்கிறார். இந்த நிலையில் வெற்றிமாறனின் புதிய படம் குறித்த தகவல் வெளியாகியுள்ளது. வாடிவாசல் படத்துக்கு பிறகு ஜுனியர் என்டிஆர் - தனுஷ் இணைந்து நடிக்கும் படத்தை வெற்றிமாறன் இயக்கவிருக்கிறார்.

இந்தப் படத்தையும் விடுதலை படத் தயாரிப்பாளர் எல்ரெட் குமார் தயாரிக்கிறார். சமீபத்தில் ஹைதராபாத்தில் ஜுனியர் என்டிஆரை சந்தித்து வெற்றிமாறன் கதை ஒன்றை சொல்லியிருக்கிறார். அது அவருக்கு பிடித்துப் போகவே உடனடியாக படத்தில் நடிக்க சம்மதித்ததாக கூறப்படுகிறது.

வெற்றிமாறனின் அசுரன் படம் தெலுங்கில் வெங்கடேஷ் நடிப்பில் ரீமேக் செய்யப்பட்டு நல்ல வரவேற்பை பெற்றது. இந்நிலையில் வெற்றிமாறன் படத்தில் ஜூனியர் என்டிஆர் நடிக்க உள்ளதாக தகவல் வெளியாகி இருப்பதால் ரசிகர்கள் உற்சாகத்தில் உள்ளனர்.

newstm.in