வீடுகள், கட்டிடங்கள், வீட்டுமனைகள் ஆன்லைன் அப்ரூவல் பெற கட்டணங்கள் அறிவிப்பு..!

நாமக்கல் கலெக்டர் உமா வெளியிட்டுள்ள செய்திக்குறிப்பில் கூறியுள்ளதாவது:

நாமக்கல் மாவட்டத்திலுள்ள ஊரகப் பகுதிகளில் மனைப்பிரிவுகளுக்கான அனுமதி மற்றும் கட்டிட வரைபட அனுமதி ஆகியவற்றை எளிதில் பெறும் வகையில் சுய சான்றளிப்பு தொகுதியின் கீழ் ஆன்லைன்பிபிஏ.டிஎன்.ஜிஓவி.இன் என்ற வெப்சைட்டில், பொதுமக்கள் ஒற்றை சாளர முறையில், கட்டிட வரைபட அனுமதி பெற்றுக் கொள்ள ஊரக வளர்ச்சித்துறை மூலம் உத்தரவு வெளியிடப்பட்டுள்ளது.

மேலும் அதில் கட்டிட வரைபட அனுமதி ஒப்புதல் கட்டணங்களின் விவரம் அறிவிக்கப்பட்டுள்ளது. அதன் விபரம்:

நகர்ப்புறத்தை ஒட்டியுள்ள கிராம பஞ்சாயத்துக்களான, எலச்சிப்பாளையம் ஊராட்சி ஒன்றியம் மண்டகப்பாளையம் பஞ்சாயத்து, எருமப்பட்டி ஊராட்சி ஒன்றியம் ரெட்டிப்பட்டி பஞ்சாயத்து, மோகனூர் ஒன்றியம் லத்துவாடி, புதுச்சத்திரம் ஒன்றியம் பாப்பிநாய்க்கன்பட்டி, செல்லப்பம்பட்டி, திருச்செங்கோடு ஒன்றியம் ஆண்டிப்பாளையம், அணிமூர், தேவனாங்குறிச்சி, கருவேப்பம்பட்டி, ஓ.ராஜபாளையம், புதுப்புளியம்பட்டி, சிறுமொளசி, டி.கைலாசம்பாளையம், வரகூராம்பட்டி, வெண்ணந்தூர் ஒன்றியம் கட்டனாச்சம்பட்டி, ஆர்.புதுப்பாளையம் ஆகிய பகுதிகளில் கட்டிட வரைபட அனுமதிக்கு ஒரு சதுரடியின் மதிப்பு ரூ. 25 வீதம் கட்டணம் செலுத்த வேண்டும்.

இது தவிர மாவட்டத்தில் உள்ள அனைத்து கிராம பஞ்சாயத்துக்களுக்கு ஒரு சதுரடியின் மதிப்பு ரூ. 15 ஆகும்.

வீட்டுவசதி மற்றும் நகர்ப்புற வளர்ச்சித் துறை 2,500 சதுர அடிக்கும் குறைவான நிலப்பரப்பு மற்றும் 3,500 சதுர அடி வரை கட்டப்பட்ட குடியிருப்பு கட்டிடங்களுக்கு சுய சான்றிதழின் அடிப்படையிலான கட்டிட வரைபட அனுமதி செயல்முறையை அறிமுகப்படுத்தியுள்ளது.

அதன்படி சுயசான்று மூலம் பொதுமக்கள் பயன்பெறலாம். ஒற்றைசாளர முறை மூலம் 2,500 சதுர அடிக்கு மேற்பட்ட மனை அல்லது 3,500 சதுர அடிக்கு அதிகமான கட்டுமான அளவுள்ள வகைகளுக்கு பல்வேறு பிரிவுகளின் வளர்ச்சிக்கான ஒரே கட்டணமாக கட்டிட வரைபட அனுமதி பெறுவதற்கு கீழ்க்கண்ட கட்டணம் நிர்ணயிக்கப்பட்டுள்ளது.

2,500 அல்லது 3,500 சதுரடிக்கு மேல் கட்டப்படும் கட்டிடங்களுக்கு ஏ டைப் ஒரு சதுரடி ரூ. 27, பி டைப் ரூ. 25, சி டைப் ரூ. 22, டி. டைப் ரூ. 15. வணிக கட்டிடங்களுக்கு குடியிருப்புகளுக்கான கட்டிடங்களை விட 20 சதவீதம் அதிகம்,

அதன் விபரம்: ஏ டைப் ஒரு சதுரடி ரூ. 32, பி டைப் ரூ. 30, சி டைப் ரூ. 26, டி. டைப் ரூ. 18. ஆஸ்பத்திரிகள், கல்வி நிறுவனங்கள், ஓட்டல்கள் உள்ளிட்ட தொழில்துறை நிறுவன கட்டிடங்களுக்கு குடியிருப்புகளை விட 60 சதவீதம் கூடுதல் கட்டணம், அதன் விபரம்: ஏ டைப் ஒரு சதுரடி ரூ. 43, பி டைப் ரூ. 40, சி டைப் ரூ. 35, டி. டைப் ரூ. 24.

குடியிருப்பு மனைப்பிரிவுகளுக்கான அனுமதி கட்டணம்: ஏ டைப் ஒரு சதுரடி ரூ. 4-5, பி டைப் ரூ. 3-4, சி டைப் ரூ. 2-3, டி. டைப் ரூ. 1-2.
தொழில்துறை மனைப்பிரிவுகளுக்கான அனுமதி கட்டணம்: ஏ டைப் ஒரு சதுரடி ரூ. 6-7.50, பி டைப் ரூ. 4.50-6, சி டைப் ரூ. 3-4.50, டி. டைப் ரூ. 1.50-3. ஒரு மனைக்கான ஒப்புதல் கட்டணம் ரூ.10,000 ஆகும்.

மேற்காணும் விவரங்களின் படி பொதுமக்கள் ஆன்லைன் மூலம் விண்ணப்பம் செய்து விரைவாக வரைபட அனுமதி பெறலாம் என கலெக்டர் தெரிவித்துள்ளார்.